SHILLONG: West Garo Hills a·jani Mahendraganj gita West Bengal a·dokni Balurghat-Hili-ona ramako tariangna gita Meghalaya sorkari, ma·mong sorkarini dakchakaniko bi·ataha.
Agartala-o chang 72-gipa North Eastern Council (NEC)-ni Plenary Meeting-ko ong·atanio, a·dokni Power Minister AT Mondal, jinmana aganprakengon, West Garo Hills a·ja gita West Bengal-ona ramako tarianichi, Meghalaya a·doko bading chiwalaniko tang·doatanisan ong·aigija, songre songgabatanioba kilometre 600-oniko km 85-ona bakkandikatani gita ong·e bang·en namgni ong·gen ine ia ramako tariani bidingo aganaha.
Ia project-ni gamchatgipa ong·aniko janapangkuengon, ian salgro salaram jol gimiknan re·a doani aro bading chiwalanio bang·en namgniko ra·bana dakchakgen ine Mondal parakataha.
Dhubri-Phulbari dolongko tarianio kamrangko ta·rakbatatahani gimin ua a·songni Prime Minister Narendra Modi baksana Meghalaya aro Assam a·dokni Chief Minister-rangkoba mittelpilangaha.
Ia Dhubri-Phulbari dolongni bakroaniara kilometre 19.3 ong·e India aro Asia-o bakrobatsranggipa dolong ong·enga ineba ua aganaha.
“Dhubri-Phulbari dolong aro Balurghat-Hili-Mahendraganj ramako matchotahaode ian South-Asian a·songrang baksa bading chiwalgrikna cholrangko oe on·gnok,” ine a·dokni Power Minister aganaha.
Da·o dipet North Bengal gitasa a·songni gipin bakrangona re·na nangengani a·sel salgro salaram jolni manderangna neng·nikanirang ong·engani gimin ia project-rangara salgro salaram jol gimiknan namgni ong·gnok ineba ua aganaha.
Dhubri-oni Phulbari-ona taribaenggipa dolongko rikna gita 2019-2020 bilsirango a·bachengahachim aro ian Dhubri-oni Tura, Nongstoin aro a·dokni gipin biaprangonaba rama gita songreani chol ong·gnok.
Ia dolongko gong kror 4,997 korosrangchi rikenga aro ian chibima dilgniko chobate songrena nanggipa Assam aro Meghalaya a·dokni manderangna namgni ong·gnok.
Indake ong·engon, Meghalaya a·doko Pumped Storage Project (PSP)-rangko rikna gitaba a·dokni Power Minister, tangka paisani gita dakchakanirangko on·china ma·mong sorkariko mol·molangaha.