SHILLONG: MDC election-na skang Congress party-na dal·bea ka·dongani ong·gen, gitcham MLA aro Trinamool Congress dilgipa George Lyngdoh, Congress party-ona re·bapilnaba dongakon.
Sombar salo MPCC chief Vincent Pala, kobor ra·timgiparang baksa agangrikmitingo George Lyngdoh-ko grongaha aro uko party-ona re·bapilchina mol·molaha ine aganaha.
“ George Lyngdoh, uni supporter-rang baksa agangrikenga, da·al uni chanchiako parakatgen.”
George Lyngdoh, dozen MLA-rang baksa Assembly election-na skang Congress-oni ong·kate Trinamool Congress-o napaha. Indiba ua election-o sirikaha.
Indake Pala, party-o namgipa politician-rangko nanga ine Lyngdoh-ko party-ona rimbapilanina warachakaha.
Iarangni gisepon Pala, MDC election-na January jani skanggipa antio candidate-rangni list-ko parakatgen ine u·iataha.
VPP, Congress-na bilakgipa susagipa ong·ama ine sing·aon Pala, indine aganchakaha, “ian constituency-osa pangchaka unbaksana Congress aro gipin political dolrangni gisepo susagrikaniara constituency-ni level-o ong·a.
“Niatgenchimode gipin political dolrangnade Congress-an bilakgipa susagipa ong·a.”
Uandake election-o tangkani bilni gimin sing·aon “beben ruling ba bilo donggipade bilo dongkamna tangkani bilko jakkalna jotton ka·gen’ ine aganaha.
“Deputy CM-ba VPP dongjawa, election-na jagni skangan uamangni bang·a candidate-rang susana gong·jaengjok aro bang·an independent susana chanchienga aro NPP-na neng·nikgen ine aganaha.
