SHILLONG: Sombar salo, chang 14-gipa Rozgar Mela-ko Shillong songjinmao ong·atangaha aro ia mela-ko ong·atanio Meghalaya a·dokni sak 124 candidate-rangna Rural Development-ni Union Minister of State (MoS) Kamlesh Paswan-ni jakchi appointment letter-rangko sualataha.
Ia apsan salon a·songni dam 45 biaprango Rozgar Mela-ko ong·ate, kamo rimnapako man·gipa manderangna appointment letter-rangko sualataha aro uandaken Meghalaya a·dokoba ia apsan program-ko ong·atangaha.
Kamo rimnapako man·gipa gital candidate-rang sorkarini dingtang dingtang department-rang, jekai CRPF, Sashastra Sima Bal (SSB), Indo-Tibetan Border Police (ITBP), Health Ministry, Indian Railways, Border Security Force (BSF), Postal department, Finance Ministry aro uandakgipa department-rango kamko ka·na seokako man·ahachim.
Ia chang 14-gipa Rozgar Mela-ko a·songni Prime Minister Narendra Modi, internet gita a·bachengate on·angaha aro a·song gimikni sak 71,556 candidate-rangna appointment letter-rangko sualatanikoba nitimangaha.
