SHILLONG: Meghalaya a·dokni dingtang dingtang skulrango sorkarini on·gimin chuttina agre skatang chuttirangko on·jachina gita a·dokni Education Department, skul ge·antinan ge·etaniko on·angaha.
Education Department-ni u·iatgimin gita 2025 bilsini February 10 tarik dipet skulrangko a·bachengna somoiko donsoahaon, Meghalaya Class Readiness Programme-ko February 10 tarikoni March 7 tarikona Class I-oni V-ona aro February 10 tarikoni February 28 tarikona Class VI-oni Class X-ona ong·atna tik ka·manaha.
Indake ong·engon, bilsi rikkit skul ge·antio porikka ra·baenga gita jadokni porikkarangko ra·ronga gita dakangkugen indiba Class VI-oni Class IX-ona bilsini porikkana Education Department routine aro somoirangko tik ka·anggen jekon Department-ni website-o niksona gita man·gen ine u·idapataha.
Uandake 2025 bilsini academic session-ko pre-primary class-na November 28 aro class I-oni IX-ona December 17-ko bilsini bon·chotgipa skiani sal ba skie ra·ani salna Education Department manchisoaha.
Una agreba Education Department, a·dokni skul ge·antion komibeoba bilsi gimiko sal 200 kam ka·ako aro konta 800-ko bi·sarangna jakkalenba u·i-ma·siatna krengna mol·molaha, aro class VI-oni class X-ona bilsi gimiko sal 220-ko jakkale konta 1000-mangni gisepo skie on·china didiangaha, jean Education Department-ni miksonga baksana Right Of Children to Free and Compulsory Education (RTE) Act, 2009-o ge·etgiminba ong·a.