TURA: Adita salrangna skang, North Garo Hills a·jani Dainadubi jolo, bol cha·ue salangenggipa Assam-ni gari bolsako, Dainadubi jolni dingtang dingtang NGO-rang rim·na man·aha.
Koborko on·ani gitade, Dainadubi jolo donggipa Rongmatchu Nawari buringrangoniko niam gri bol rate, Assam aro gipin biaprangona ra·angrongengani gimin Dainadubi-ni GSU, AHAM, DCYO, AAYF, AGPF, GSMC, AUIF aro AYWO dolrang, nirikkianirangko dakrongengachim. Uandaken, December-ni 23 tarik waloba ia dolrang, nirikkianirangko dakengmiting somoio, pringwalni 4:00 bajimango, AS-01PC 0455 gari bolsako, adita ratgimin bolrang baksa rim·na man·aha.
Ia bolrangko salangenggipa manderangde, NGO-rangni membor-rangko nikenba, ua biapon gari aro bolrangko gale, ua biaponi kataha ine NGO-rang parakataha.
Ja·mano ia gari aro bolrangko NGO-rang, Chima Bangsi (Dainadubi) Forest Range-ni official-rangna pakwate on·ataha aro ia gari baksa bolrangni bidingo sandirokenba, nanga gita ja·kurangko de·china didiataha.