SHILLONG: Saksa instagram jakkalgipa Akash Sagar-ni kragija dake East Khasi Hills district-ni Mawlynnong-o donggipa Epiphany giljao Kristian toromni ong·gijagipa Hindu toromni inchroani gitrangko ring·enba kal·stapani gimin aroba rongtalgipa torom nokko marang nangatani gimin BJP, Akash Sagar-ni kosako matnangaha.
Indakgipa kamrang, Kristian bebra·agiparangko sa·dikata aro indakgipa ong·gijagipa kamrangko ka·enba an·tangko mingsingatna dakaniara torom-torom gipinni gisepo nanggrikatani ba mitchigrikataniko ra·bagen ine BJP Spokesperson, M Kharkrang aganaha.
“Indakgipa kamrangko mamingsaloba dakna nangja, mongsongbate je a·dokon je toromni bebera·giparangba tom·tome olakina gita cholrangko man·enga aro pilak jatrangan saksa sakgipinni festival-rango bak ra·grikenga,” ua aganaha.
Christmas-ni somoio dingtang dingtang giljani dilgiparangko grongeani gimin Prime Minister Narendra Modi-ko mittele aganengon, BJP ia chadambeni ong·gijagipa kamrangko raken jegalaha.
“ Ian gisik ra·na krabeani je chong·motan, Christmasni somoio Prime Minister an·tangan giljani dilgiparang baksa bakrimeaniko dakaha aro pilakna ka·saani kattako gisik ra·aniko ua an·tangan a·songo dilaha. Jedakgipa dol ba mandeba ong·bo, tom·tomaniko nosto ka·na dakgipani kosako matnangna ba jegalna krachong·mota aro mikkangchi iandakgipa a·selrang ong·taijana gita champengsoaniko dakna nanga aro dosi dakgipako rim·en police bichal ka·na nanga,” BJP ku·wattimgipa M Kharkrang aganaha.
