TUR, Hindu chadambeni kosako FIR ka·a
SHILLONG: Million 1.5 mangni gita follower donggipa saksa social media influencer Akash Sagar-ni, bang·gija salrangna skang Mawlynnong-ni Epiphany Gilja noko Jai Shri Ram gitko ring·enba uni social media account-o waten Kristianrangko kal·stapani gimin Meghalaya-o donggipa Kristian manderangni gisepo namen ding·chaotokaha.
Uni kragija Kristianrangko mande ra·gijani ba onia ka·aniko Kristian manderang ra·chakna man·tokjaha. Indake uni post ka·gipa video-ko nien bang·bata mandera·an jegalattokaha.
Unomitingo, social mediao niksenggipa saksa Akash Sagar-ni, Kristianrangni bebera·aniko chonnik-kal·stape Kristianrangna gisiko saataniko ra·baanina aroba jatsa-jat gipinni gisepo nangrimaniko so·sojengjenga ong·atanina Shillong songjinmao donggipa social activist ba songsalni namgnina kamko ka·gipa saksa Angela Rangad, Akash Sagar-ni kosako Laitumkhrah Police Station-o FiR-ko segataha. Akash-ni daka kamara, ian Constitution-o je toromkoba ja·ikna on·gimin bilko pe·ani ong·a, unigimin uni kosako rakgipa sastiko on·china gitaba ua didiaha.
Jolo donggipa Kristian dolrang aro songni manderangba, ia ong·a obostani bidingo suk ong·gijaniko parakatengon, iandakgipa obostarangko mikkangchi champengsona gita authority-rang ba bil man·giparang, dos dakgipa mandeko ta·rake rim·enba sastiko on·na nanga ine didiaha.
Meghalaya-ni Central Puja Committee (CPC)-ba ia ong·a obostani kosako jegalaniko dakenba, iani bidingo am·sandianiko dakenba dos dakgipani kosako niamo pangchake sastiko on·china gita district administration-ko didiaha.
Batanggimin sal bonga mangna skang chadambe saksa jean Hindu torom-oni ong·achim, uni Kristianrangko chonnike, Mawlynnong-ni Epiphany gilja nokdringo ‘Jai Shri Ram’ gitko ring·ani video-ko uni social media account-o watani a·sel Meghalaya-o songdongenggipa Kristian toromni manderang ding·chaotokaha.
Indake ia ong·a obosta Kristian-rangko mande ra·gijani ba onia ka·ani inenba jinma matnangataniko dakangaha. Ia video-ko nikgiparang chu·gimik lak 10 mang ong·nasipile ia chadambeni daka kamni gimin jegalattokaha.
Indake ong·engon Shillong songjinmao-ni saksa social activist Angela Rangad, jean Thma U Rangli-Juki (TUR) NGO dolni dilgipaba ong·a, ia Hindu chadambe Akash Sagar-ni kosako Kristianrangni gisikko saatahanina aro jatsa jatgipin baksa meli nangrimaniko so·sojengjeng ong·atahanina Laitumkhrah Police Station-o FIR ka·aha. Ian Inidia A·songni Constitution-o, Right to Freedom of Religion ba toromko ja·rikna jakgitel on·gimin bilko pe·ani ong·a inenba ia dos dakgipa mandeni kosako raka sastiko on·china didiangaha.
