TURA: A·chikrangni dingtangmanchagipa daka rikanirangko mesokna gita December-ni 27 aro 28 tarikrango salgnina Wangala manianiko, Assam a·dokni Goalpara a·jao donggipa Bakrapur songo ong·atangaha.
Ia Wangala manianiko a·bachengatanio, Assam a·dokni Education aro Tribal Affairs (plain) Minister Dr Ranoj Pegu, mongsonggipa sokgipa ong·e bak ra·angaha aro unbaksana Rabha Hasong Autonomous District Council (RHAC)-ni Chief Executive Membor Thangkeswar Rabha aro dingtang dingtang dilgiparangba bak ra·angtokaha.
Ia Wangala manianiko a·bachengatanio, Assam-ni Education Minister Dr Ranoj Pegu, jinmana aganprakengon, jatni dakbewal rikbewalko ripinge rakkina gita ia Wangala manianiko ong·atahani gimin All Assam Garo Cultural Society-ko mittelpilangaha.
Ia Wangala manianio RHAC-ni CEM Thangkeswar Rabha-ba jinma aganprakengon, mikkangchiba ia Wangala manianiko dal·bate aro ga·subate ong·atangkuchina Assam a·doko songdongenggipa A·chikrangko didiangaha aro mikkang bilsio ia Wangala manianiko ong·atna gita gong 25,000 tangkarangkoba on·gilataha.
Ia salgnina ong·atanggipa Wangala manianio, Assam a·doko songdongenggipa dingtang dingtang A·chik songrangoni Wangalgipa dolrang bak ra·angtokaha.
