SHILLONG: Ru·utbea bilsirangna a·dok damgnini simarango ong·enggipa golmalrangko namatna Meghalaya sorkarini krenge kam ka·anio bakrimaniko on·china gita United Democratic Party (UDP), Assam sorkariko didiataha.
“A·dok damgnini simarango ong·enggipa golmalrangko namatna gita Meghalaya a·dokchipaknide kamrangko ka·engani gimin ia golmalrangko ta·raken namatna man·na gita Assam sorkariba bakrimgen ine chinga ka·dongenga,” ine UDP-ni general secretary Jemino Mawthoh aganaha.
A·dok damgnini simarango ong·enggipa golmalrangko namatna gita a·dok damgnini gnigipa agangrikani bak gita ia biaprangko apsan re·ange nina Assam sorkari maming ja·kurangko de·jaengani gimin ua ia kattarangko aganaha.
Bilsigni ong·pilengahaoba a·dok damgnini gnigipa agangrikani be·en pil·na man·kujaenga ine sing·anina aganchakaniko on·angengon, “Ian skangoni ong·baenggipa golmalrangsa ong·a aro da·o kamrangko matchotatna Meghalaya sorkari jako ra·e kam ka·enga,” ine Mawthoh aganaha.
A·dok damgnini gisepo skanggipa agangrikani matchotaha aro bangki dongkuenggipa biaprangoba meligrikaniko ra·bana gita a·dok damgnichipaknin krenge kamko ka·enga ineba ua aganaha.
“Da·o gnigipa bakko a·bachengahani gimin anga iako na·simangna aganna ska, chong·motan ia golmalrangara ru·uta bilsirangonin ong·baenggipasa ong·a aro ia golmalrangko walsanode namatna man·jawa. An·ching chong·mot a·selrangko ma·sie ra·na nanggen aro simarango songdongenggipa manderangni aro Autonomous District Council damgnini gisepo agangrikanikoba nanggen,” ine UDP-ni general secretary parakataha.
A·dok damgnini simarango golmalrangde dongaigen indiba ia golmalrangko namatna kamrangko ka·enga ine janapatengon, “Iani giminsa dingtang dingtang regional committee-rangko songaha aro 2025 bilsiode a·dok damgnini gisepo agangrikanirang chu·sokgipa ong·gen ine an·ching ka·dongna,” ine Mawthoh aganaha.
Ru·uta bilsirangna Meghalaya aro Assam a·dokni simarango ong·enggipa golmalrangko namatna a·dok damgnini gisepo gnigipa agangrikani da·o bon·chipengon, a·dok damgnini gisepo agangrikaniko a·bachengpiltaina Meghalaya sorkari jotton ka·engoba Assam a·dokchipakni kamrang ka·sinenga ine adita salrangna skangsan, a·dokni Cabinet Minister aro West Khasi Hills regional committee-ni chairman Paul Lyngdoh parakatahachim.
Meghalaya aro Assam a·dokni simarango batanggimin bilsi 50-na meligrikna man·jaenggipa dam 12 biaprangoni damdok biaprangode tom·tomaniko ra·bapilna gita a·dok damgnini dilgiparang songgigrike soi ka·manahachim aro ia soi ka·grikanio Union Home Minister Amit Shah-ba dongpaahachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·achim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.
Da·o gnigipa bako namatna gita agangrikenggipa damdok biaprangara, Langpih, Borduar, Deshdoonreah, Block I-II, Pisar-Khanduli, aro Nongwah-Mawtamur (Garbhanga) ong·skaengachim.
 |
ReplyForward
|