SHILLONG: Meghalaya a·doko gitchambatsranggipa gilja nokrangoni damsa, Mawlynnong songni Epiphany Church-o adita salrangna skang kragija dake ‘Jai Shri Ram’ ine a·bokgipa social media influence Akash Sagar-ni kosako rakbatsranggipa ja·kurangko de·china Mawlynnong Dorbar Shnong, a·dok sorkari aro district administration-ko didiangaha.
Mawlynnong songni dilgipa (Rangbah Shnong) Thomlin Khongthohrem-ni u·iatani gitade, iani bidingo uamang police-rangni sandiroke man·aniko sengkuna tik ka·aha.
Ia a·selni bidingo songni manderang darangba ma·sijachim ine janapatengon, social activist Angela Rangad-ni FIR ka·aniko songbadrango seaniko nikani ja·mansa uamang ia a·selni bidingo ma·sina man·aha ine Khongthohrem parakataha.
Ia mande (Akash Sagar), re·anggipa antini Robibar salo uamangni gilja nokona re·ange ia kragijagipa kamko ka·ahakon ineba ua aganaha.
Rangbah Shnong-ni aganani gitade, pringni gilja jokani ja·man uamang gilja nokko chipe donrongja maina uamang salpaksachibaraba ia noko gilja ka·rongachim.
Ia a·selni bidingo uni aro mondolini gipin dilgiparangni agananiko knae ra·na gita police-rang, ua songona re·angaha ineba Khongthohrem parakataha.
Indake ong·engon, ia gilja noko kragija kamko ka·anichi mondoli aro songni manderangna gisik saaniko ra·baahani gimin ia mandeni kosako police-rang rakgipa ja·kuko de·na ku·rachakaniko on·angaha ineba ua aganaha.
Meghalaya a·dokni torom biaprangona re·baenggipa tourist-rangna rakgipa niamrangko ra·gatchina Hynniewtrep Youth Council (HYC)-ba a·dok sorkariko didiangaha.
Mawlynnong songni Epiphany gilja noko kragija kamko ka·ahani gimin gipin biaprangoni re·baenggipa manderangna rakgipa niamrangko ra·gatchina HYC dabiangaha.
Ian dingtang dingtang jat aro toromni gisepo ding·chaogrikaniko ra·bana jotton ka·anisa ong·aha ine janapatengon, iandakgipa kamrangko mikrakbate nirok sandichina a·dok sorkari aro tourism-ni kamrango bak ong·enggipa dingtang dingtang dolrangko HYC didiataha.