SHILLONG: Meghalaya a·doko Meghalaya State Investment Promotion Facilitation Act (MSIPFA) 2024 ra·gataniko jegalenga ong·ode an·tangtangni ku·pattianirangko on·skachina gita a·dokni Tourism Minister Paul Lyngdoh, dingtang dingtang dolrangko didiataha.
Ia MSIPFA-ara, Invest Meghalaya Authority (IMA)-na a·arangko bree, ia apsan a·arangkon private investor-rangna para on·skana gita bilko on·ani ong·engachim.
“Ian ong·ja ine aganade altubea, uni gimin sorkarini ra·gatenggipa niamara ong·jaenga ine nikenga ong·ode, uamangni nikanio nambatgipa niamko chingna mesoke on·skachina,” ine Lyngdoh, dingtang dingtang dolrangni MSIPFA-ko jegaltokengani gimin sing·anina aganaha.
Kamrang jegalanichide bon·na nangja ine janapatengon, sorkarini draft ka·ana bate nambata ine nikenga ong·ode an·tangtangni draft ka·ako sorkarina mesokskachina ine Lyngdoh, jegalenggipa dolrangko didiataha.
“Gipin cholrangko mesoke on·gija jegalaianikode anga ong·e nikna,” ine Tourism Minister aganaha.
MSIPFA-ara Assembly-o jinma chanchirime pass ka·gimin niaman ong·a ineba Lyngdoh, talataniko on·angaha.
Lyngdoh-ni aganani gitade, ia niamchi land bank-ko bikotaniara, namroro silroroaniko ra·bana miksonganian ong·engachim.
Indake ong·engon, ia MSIPFA-ni niamrangko nambatatna gita dingtang dingtang dolrang baksa chanchirimna ku·monganiko a·dokni Tourism Minister ra·chakangaha.
