SHILLONG: Re·anggipa Sombar salo, Congress, HSPDP, TMC aro NPP-ni bang·bea dilgiparang aro uamangna chakpaenggipa manderang, United Democratic Party (UDP)-o napangaha aro uamangko UDP Mawkyrwat circle-ni tom·aniko ong·atanio, UDP central body-ni working president aro KHADC-ni gitcham Chief Executive Member (CEM) Titos Chyne baksana gipin dilgiparang rimchaksoaha.
Ia tom·anio, Mawkyrwat MLA Renikton L Tongkhar aro UDP-ni dingtang dingtang dilgiparangba bak ra·angtokaha.
Ia tom·anio, UDP-o napanggipa dingtang dingtang party-rangni dilgiparangko aro gipin membor-rangna rimchaksoani kattarangko aganangengon, Mawkyrwat constituency-na Jeslanroy Nongsiej-ko UDP-ni candidate ine KHADC-ni gitcham CEM Chyne parakataha.
Re·baenggipa February jani 21 tariko ong·atna sienggipa district council election-o UDP-ko chegipa ong·atna gita unit-tangtango rake kamrangko ka·china gitaba Chyne, UDP-ni gital aro gitcham membor-rang pilakkon didiangaha.
Mawkyrwat constituency-na UDP-ni candidate ine mingako man·gipa Jeslanroy Nongsiej-na agan-ku·pattianirangko on·angskaengon, ia election-o seokako man·genchimode pangnan manderangni namgnina kamko ka·china aro dolsaoni dolsaona katjojojachina Chyne didiangaha.
