SHILLONG: East Jaintia Hills a·jani ning·o donggipa NH-6 rama gita koela salruaenggipa truck
garirang nangana bate koelarangko gate salanichi a·dokni ramarangko nosto ong·atan baksana a·doko songdongenggipa manderangna jajrenganikoba ra·baenga ine Joint Action Committee(JAC) Dong
Namchiang Unit parakataha. la JAC-ni ning·o adita songrang donga, chong·motan Ratacherra, Dona Umbluh, Dona Sku, Umkiang, Lumphyllut, Lumsoski, Pyrtakuna, Borsara, Kuliang Shymplong, aro Tongseng ong·a.
Batanggimin December 30 tarikni bako JAC-ni u·iatani gita ia koela salruragipa truck-rang koelarangko nangana bate salanichi ramarangko nosto ong·atan baksana ramarango a·sel ong·aonaba sokrongengachim. Indake niamko ja·rikgija koela salruraaniara songsalna namgijaniko ra·baenga ine JAC janapataha.
Ia matnanganiko dakengon koela badinggipa manderang baksa mamung neng·nikani dongia, indiba ia niamko ja·rikgijanichi a·doko tarigimin rama jal·langrang nosto ka·ako man·e, a·doko songdongenggipa manderangna neng·nikaniko ra·baengani giminsa ong·a ineba JAC parakataha.
Indake ia koela salruraani bidingo a·dok sorkarina u·iatengon, indake niam pe·aniko ta·raken
nirok-simsakna nanga jedakode ramarangko nosto ong·ataoniko naljokatna man·gen aro a·sel ong·anirangoniko chel·chakna man·gen ine JAC u·iataha.
Unbaksana iani bidingo a·dok sorkari rakgipa ja·kuko de·jagenchimode dosi donggipa truck driver-rangni kosako JAC ja·ku de·angskagen ineba mikrakataniko on·angaha.
