SHILLONG: Meghalaya a·doko game ge·e man·gipa alurang, jal·likrang aro e·chingrangko man·chape dingtang dingtang bosturangko bazar antirangona ra·angon kattiengani a·sel game ge·e cha·enggipa manderang noksan ong·na nange neng·nikanirangko chagrongna nangtokenga.
Iani bidingo kobor ra·timgiparangna talataniko on·angengon, “Chingni game ge·e man·gipa bosturangko bazar antirangona ra·angon, kg 10-prakon kg 1-kode kattienga. Chinga kg 100 ra·angode, kg 10-kode kattienga aro iachin chinga merong bag-sakode brena man·pagenchim. Iani a·selan chinga namen noksan ong·na nangtokenga,” ine East Khasi Hills a·jani K Kurbah aganaha.
Iani bidingo, game ge·e cha·giparangni game ge·e man·gipa bosturangna kraa gita damrangko tik ka·e on·china gitaba Kurbah, a·dok sorkariko didiataha.
“Chingni game ge·e cha·enggipa bosturangna kraa damko tik ka·e on·chinasa chinga mol·molenga. Chingni game ge·e man·gipa bosturangna damko tik ka·e on·genchimode chingni noksan ong·anirangko chel·chakna man·genchim,” ine ua aganaha.
Game ge·e cha·enggipa manderangni neng·nikanirangko namatna gita sorkari changni chang ku·rachakanirangko on·ahaoba skangonin a·doko game ge·e cha·gipa manderangni bosturangoniko kattienganichi game ge·e cha·giparangni neng·nikanirangko nikna man·engachim.
Game ge·e cha·giparangni game ge·e man·gipa bosturangna damrangko tik ka·e on·china gitaba uamang, committee songe on·aniko senge dongtokengachim.
“Chingni game ge·e man·gipa bosturangna damrangko tik ka·e on·na gita regulatory committee-ko songna baditaba chang ku·rachakaniko on·ahachim indiba da·alonan ia be·en pil·na man·chipkujaenga,” ine Kurbah aganaha.
“Chingna subsidy-rangko ba tangka paisani gita dakchakanirangkoba nangja indiba chingni game ge·e man·gipa bosturangna kraa damko tik ka·e on·chinasa chinga nangnikenga. Chingni neng·nikanirangko namatna gita sorkari ja·ku de·na nangchongmota,” ineba ua aganaha.
