SHILLONG: Batanggimin 2024 bilsina bate ia gital 2025 bilsi, a·dokna aro a·doko songdongenggipa manderangna namgnirangko ra·bagen ine ka·dongani baksa ia gital bilsiko rimchaksotokaha.
Ia gital bilsiko rimchaksoani bidingo kobor ra·timgipa manderang baksa agangrikengon, ia gital bilsio ua rakbate kamrangko ka·na aro an·tangni daitorangko nambate chu·sokatna miksongenga ine a·dokni Health Minister Ampareen Lyngdoh parakataha.
“Chakchikrakgipa, sengnapgipa aro tom·tomani, ka·saani aro jaksrame on·anio pattigipa ong·na gita anga Nokgipa Isolni pattianiko bi·enga,” ine Lyngdoh aganaha.
A·dokni saksa gitcham police officer aro Riatsamthiah-ni dilgipa Mariahom Kharkrang-ba ia gital bilsiko rimchaksoani bidingo janapatengon, Meghalaya a·dokba gipin a·dokrango gitan, mongsongbate lekka porani aro a·dokko rikanio namroro silrorona man·gen ine an·tangni ka·dongchakenganiko parakataha.
“An·chingni a·dokde Assam-na bate namen ja·manchakkuengani gimin an·chingni dilgiparang, an·chingni a·dokna maiba chanchisamsoanirang donggen ine anga ka·dongenga, ong·jaode 2025 bilsiba maming dingtanganiko ra·baani gri indin bon·angtaiaigen,” ine Kharkrang aganaha.
Ia gital bilsina nangnikanirangko sing·anina aganchakaniko on·angengon, ia gital bilsio Inner Line Permit (ILP)-na dabianirang chu·sokchina, Khasi aro Garo ku·sikko Eighth Schedule-o chapatchina dabiani chu·sokchina, Them Iew Mawlong-o songdongenggipa manderangko dingtang biapona apjitatchina aro Assam baksa simarang meligrikgijanirangko namatani kamrang chu·gimik matchotchina ua aro uni dol nangnikenga ine Hynniewtrep Youth Council (HYC)-ni president Roy Kupar Synrem parakataha.
Nanggija kamrango koros ka·anirangko komiate, a·dokni namroro silroroanina tangka paisarangko koros ka·china gita ua a·dok sorkariko nangnikenga ineba Synrem aganaha.
“Ia gital bilsio pekatgipa bosturangko jakkalanirang bon·angchina ba komiangchina gita chinga Anti-Narcotic Task Force (ANTF) aro gipin department-rangni rakbate kam ka·anirangko nikna nangnikenga,” ineba HYC-ni president aganaha.
