SHILLONG: North Eastern Hill University (NEHU)-ni Vice Chancellor, Prabha Shankar Shukla, re·baenggipa January 12 tarikona chutti ra·dapangaha.
Ia chutti ra·dapaniko University-ni Registrar-na e-mail gita u·iatengon, “2024 bilsini December 1 tariko angni e-mail ka·atanio pangchake, anga dingtang dingtang a·selrangchi January-ni 11 aro 12 tarikrangko man·chape December 30 tarikoni January 12 tarikona chuttiko ra·dapenga,” ine NEHU-ni VC Prof Shukla parakataha.
University-o skie ra·enggiparang ba kamko ka·enggiparang maiba neng·nikani ba nanganirang donggenchimode, University-ni Registrar una phone ka·e ba e-mail gita u·iatna man·gen ineba Prof Shukla, e-mail-o janapataha.
Uni dongjamiting somoio, University-ni ja·delbatsranggipa professor ba Pro-Vice Chancellor, kamrangko nirokskagen ineba ua parakataha.
NEHU VC-ni ra·dodapatgipa chutti, re·anggipa December 29 tarikon bon·ahachim ine nikna man·a.
NEHU-o ong·enggipa obostarangni bidingo sandirokna gita Education Ministry-ni songe on·gipa inquiry committee, an·tangtangni report-ko on·na gita re·anggipa November 29 tariko, sal 15 somoiko ra·dapahachim aro uandaken ia committee-ni ra·dapgipa sal 15, December-ni 13 tarikon bon·ahaoba da·onan report-ko on·ani bidingo Education Ministry-oni maming u·iatanirang dongskakujaengachim.
