SHILLONG: Meghalaya-o, Neolissochilus pnar minggipa na·tok, jean a·gilsak gimiko, rong·kolo donggipa na·tokrangoni dal·batsranggipa ong·achim, India-ni skanggipa ‘National Cave Animal of the Year’ bimungko man·aha aro uandaken Meghalaya a·dokna ia gital 2025 bilsiko a·bachenganio namen namgipa kobor ong·aha.
Neolissochilus pnar na·tokko 2019-2020 bilsirango, East Jaintia Hills a·jani Krem Um Ladaw aro Krem Chympe Cave-rangoniko man·chengahachim.
Ia rong·kolo donggipa na·tokara, mikron nikgijagipa andalao dongna namnikgipa aro bigilo maming rong donggijagipa rokomni na·tok ong·a. Indake ia na·tokni bimungko ‘Pnar’ jean Khasi-rangni sub-tribe-ni dol ong·a, uamangni a·doko janggi tanganio ong·telaigipa gipin janggi gnanggipa matburungrangming maikai dongengachim uko u·ichina gita pnar bimungko on·aha.
The Speleological Association of India (SAI), Indian jerangan International Union of Speleological (UIS)-o bakrimgipa dol ong·achim, uamang ia a·songni dingtangmanchagipa a·ningao donggipa matburungrangko, uamangni gitalgipa a·bachengatanio mongsonggipa dake u·iataniko on·aha. Indake bilsiantian National Cave Animal-ko ong·atna gita chanchirimanio, ia campaign-ko uamang chiringkolrangni gamchatani gimin mikrakataniko on·na aro uno donggipa pilak janggi gnanggiparangkon ripingna gita miksonganian ong·a. Indake ia dingtangmanchagipa ma·malko man·aniara an·chingni chiringkolrango ma·sikugijagipa gamchatgipa matburungrangni dongkuenganiko mesokani ong·a, ine SAI aganaha.
Indake ia campaign-o pangchake rong·kolrango donggipa janggi gnanggipa matburungrangko naljokatanirangko on·e mikkangchi ripingangkuna gita ku·monganiko nangnikanikoba ua u·iatjolaha.
Una agreba, ua na·tokko u·iataniko dakanio, dingtang dingtang scientist-rangni meligrike kam ka·anichi ma·sina gita man·aha aro uamangara, Neelesh Dahanukar (Shiv Nadar Institution of Eminence), Remya L. Sundar (Kerela University of Fisheries and Ocean Studies), Duwaki Rangad (St. Edmund’s College, Shillong), Graham Proudlove (The Manchester Museum), aro Rajeev Raghavan (Kerela University of Fisheries and Ocean Studies) ong·a.
