SHILLONG: Meghalaya a·doko Inner Line Permit (ILP)-ko ra·gatchina dabienggipani bidingo name talataniko on·china gita Khasi Students Union (KSU), a·dok sorkario dabiangaha.
“Ia bilsiode ILP-ni bidingo a·dok sorkari, ma·mong sorkari baksa bilakbate agangrikgen ine chinga ka·dongenga. ILP-na 2019 bilsion Assembly-o resolution-ko pass ka·aha aro iani bidingo ma·mong sorkari maiko dakna miksongmanchaenga, uni gimin a·dokni manderangna name talatsrangchina chinga a·dok sorkariko nangnikenga,” ine KSU-ni president Lambokstar Marngar aganaha.
Ia gital 2025 bilsio chu·sokatna nangenggipa gipin kamrangni gimin janapatskaengon, Khasi ku·sikko Constitution-ni Eighth Schedule-o napatchina dabiani, Assam-ni simarango ong·enggipa golmalrangko namatchina dabiani, chadamberangna janggi tangani cholrangko on·china dabiani aro uandakgipa dingtang dingtang dabianirangko chu·sokatchina KSU nangnikenga ine Marngar aganaha.
Iandakgipa kamrangni bidingo uamang pangnan sorkarina gisik ra·atpilaniko on·engachim ine janapatengon, “Meghalaya a·dokni pilak sorkari department-rangon, kamna seokanio parak ong·aniko KSU nangnikenga,” ine Marngar parakataha.
“MPSC-ni kamna seokanio ong·gija dakanirangko chinga changni chang jegale, sorkarina gisik ra·attaianiko on·aha aro ia neng·nikaniko namataniara sorkarini daitoan ong·a,” ine KSU president aganaha.
Manderangni neng·nikani aro nanganirangko knachakna sorkarina somoi ong·aha ine janapatengon, “Manderangni naljokanina niamrangko tarichina gitasa a·dokni manderang MLA-rangko seoke Assembly-ona watataha. Uni gimin MLA-rang, a·doko songdongenggipa manderangni nanganirangko chu·sokate on·na nangchongmota,” ine Marngar aganaha.
