A·dokni skulrango lekka-ki·tap gri skie on·anikoba dakgen: ED

Shillong: Meghalaya a·dokni skulrango poraienggipa chatro-chatrirang ia bilsi 2025-ni gisepo sal chikkingnade lekka-ki·tap gri skulona re·baenba dingtang dingtang daka-rika, rongtal-an·talani, ge·a-gamani, aro uandake janggi tanganiko namdapatanirangko skie ra·na gita cholrangko man··gen ine A·dokni Education Department parakaha.
Ia sal chikkingnade chatro-chatrirang lekka-ki·tap kebitgija skie ra·chakram biapona re·bana gita man·gen aro ian class VI oni class XII ona poraienggipa chatro-chatri rangna ong·gen aro iani bidingo Education Department A·dokni gimik skulrangna re·anggipa December 20 tarikon u·iatmantokaha ineba kobrona parakaha.
Ia lekka-ki·tap gri skie ra·aniko dakangna manchiahaon, skanggipa salni bako me·su-samjak ge·anirangko dakangan baksana bol-wa·a ge·anirangkoba dakanggen, gnigipa salni bako janggi tanganio maiba cholko skie ra·na gita donaha, gittamgipa salni bako song-nokrangko namdapatna dingtang dingtang cholrangko skie ra·angskagen, uandake brigipa salo skie ra·chakram biapko nitoatan baksana rongtal-an·tale rakkina skie ra·angskagen, bongagipa salo dingtang dingtang lekka-ki·taprangko poraianiko dakanggen.
Una agreba dokgipa salo samtangtango donggiparangko ripinge rakkina aro bol-wa·a-rangko ripingna skie on·aniko dakanggen, snigipa aro chet-gipa salni bako be·en bimangko an·seng-baljoke rakkiani bidingo skie ra·angskagen, skugipa salo jatni doka dam·ani, ring·salani aro changa sapaniko dakangskagen. Indake bon·chotgipa salni bako dingtang dingtang kal·susaanirangko dakangskagen.
Una agreba ED-ni u·iatgimino Govt. Lower Primary skulrangko pring 9 bajioni salni 1 bajiona konta 4, aro Govt. Upper Primary skulrangko pring 9 bajioni salni 2 bajiona konta bonga skie on·anirangko dakchina u·iatmanaha. Unbaksana Govt. Sec. Skul-rango pring 9-oni salni 3 bajiona konta 6 skie on·china aro Govt. Higher Sec. skul-rangko pring 9-oni salni 4 bajiona konta 7 skie on·aniko dakchina gita ge·etaniko on·manahachim.