Resubelpara: North Garo Hills (NGH), Mendipathar PS-ni ning·o ga·akgipa Dagal songo jikseni gisepo golmal ong·anio jikgipako sakgipinna amite doka-sataha aro uni ja·man segipa nokoni kataha. Ia obosta meja bilsi December 29 tariko ong·ahachim indiba ru·ute koborko man·aha. Obosta ong·ani salpin December 30 tariko nokdangni manderang kobor on·aha. Doka man·gipako jolni PHC-ona sanna gita ra·angaha aro ua apsan salon sanna matchote noktangona watpilataha.
Kate dongenggipa Tunin Momin-ni kosako FIR segataha, police -rang uko sandienga.
“Sakgipinna amitani jikseni gisepo golmal dal·angaha, jeni a·sel segipa, jikgipako dokaha aro uni ja·man segipa kate dongenga. Da·ode duko ga·akgipa me·chikni obosta namkaljok aro segipani kosako mamalko segataha, ine district police chief Swapnil Pawar aganaha.”
