SHILLONG: A·dok sorkari, Jal Jeevan Mission (JJM) project-ko ia bilsini April-May jao matchotatna miksongenga. Project-ni kamrangba matchotnasiengjok.
“Kamrang matchotnasiengjok. Matchotani somoikode tik ka·na man·kujaenga indiba ia bilsini April-May jaon matchotna jotton ka·gen. Baditana kamrang matchota uko niaignok,” ine PHE Minister Marcuise N Marak aganaha.
Niatgenchimode a·doko JJM project-ni kamrangko ka·anio dongimin somoirango matchotna man·rikjaha. Adita changnan matchotani somoi bataha.
Meghalaya-o JJM project-ko ra·gate kam ka·ani gimin sing·aon Minister Marcuise Marak indine aganaha, “Current figure-kode nia dongkujaenga indiba project-ni kamrang 80 percent matchotengjok. Department, project-ko ta·raken matchotatnade jotton ka·engachim indiba kamrangko adita neng·nikarangko chagrongani gimin matchotna man·kukjaenga.”
“Mitam project-rangkoba Forest department aro a·a nokgiparangni ra·chakaniko man·kujani gimin matchotkuja. Project-ko ra·gatna adita neng·nikarangko chagrongenga. Jeba ong·china project-ko somoi gita matchotatna department raken jotton ka·enga.”
Ma·mong sorkarini program Jal Jeevan Mission (JJM), bilsi 2024-ona gimik nokantiona chi pipeko sale on·na miksonganio parakataha.
