SHILLONG: Rabha Hasong Autonomous Council (RHAC)-ni Sixth Schedule status-na dabianio chakpaanina Garo Students’ Union (Assam State Zone)-ko All Assam Garo NGOs Forum, champengatna parakaha.
Forum-ni parakatani gitade, “A·chik jatko togiani gimin Assam-ni Garo NGO-rang aro A·chik jatrang melienba Assam-ni GSU (ASZ)-ko champengatna tik ka·aha” ine koborna parakataha.
Forum-o man·gopgimin Garo Students Federation of Assam (GSFA), Garo Autonomous Council Demand Committee (GACDC), Garo National Council (GNC) Assam State Zone aro gipinrang dongengkua, jemangan, Garo Studentst Union (ASZ)-ni daka kamko ra·chakna man·gija raken jegalataha.
Rabha Hasong Autonomous Council (RHAC)-ni ning·o donggipa A·chikrang, Assam-o, Garo Autonomous Council-ko songchina dabie dakgrikenga aroba RHAC-na Sixth Schedule status-ko on·na skang A·chikrangni songrangko RHAC-oniko ra·galchina gita ru·uta bilsirangonin dabienga.
Indakmitingo Garo Students’ Union (Assam State Zone), Rabha Hasong Sixth Schedule Demand Committee (RHSSDC) baksa bakrime A·chik jatko cha·bokaha ine Forum matnange aganaha.
“RHAC-ni, Sixth Schedule status-na dabianio chakpaaniko on·enba, GSU (ASZ) Assam-o songdonggipa A·chik jatko cha·bokaha” ine Forum suk ong·gijaniko parakaha.
Assam-o songdonggipa A·chikrang, GSU (ASZ)-ni kamko raken jegalattokaha. GSU-ASZ, darang baksaba maming agangrikaniko dakchenggija RHAC-ni Sixth Scheduled-na dabianio jak on·epaha, ian A·chik jatni kosako uamangni dakbadeani ong·a ineba Forum aganaha.
Batanggimin somoio Janta Mantar, Delho RHSSDC-ni Dharna dakmiting somoio GSU-ASZ-ni dilgiparangni uamangna chakpae bakko ra·epaani bidingo matnange aganani giminba, GSU-ASZ dilgiparang, re·anggipa December 23, 2024 tariko UGACMC, Assam-ni Chaiman Pholince Sangma-ko jaksi otenba inchakatahachim.
RHAC-ni Sixth Schedule-na dabianio chakpaanina GSU (ASZ)-ko champengata
Date:
Share post:
