SHILLONG: Bilsi bongaprakon Bharatiya Janata Party (BJP)-ni Sangathan Parv ba Organisational Celebration-ko ong·atanio ia changoba a·song gimiko lakni lak gital membor-rang, bimingrangko segattaiaha aro unbaksana a·songni Prime Minister Narendra Modi-ko man·chape gitcham membor-rangba, an·tangtangko gital dake party-na on·kangtaiaha ine u·iataha.
“Sangathan Parv 2024-ko ong·atani a·song gimikon chu·sokgipa ong·aha maina da·o BJP-o kror 12-na baten primary membor-rang dongaha. Ia program-ko ong·atanio, lakni lak manderang BJP-o bimingtangtangko segattaiaha aro Meghalaya a·dokoba hajalni hajal manderang, an·tangtangni bimingko segate da·o BJP-ni membor ong·aha,” ine BJP-ni dilgiparang parakataha.
BJP-ni state president Rikman G Momin-ni dilanichi da·o Meghalaya a·doko BJP-ni membor-rang bang·bataha ine janapatengon, BJP-ni namroro silroroani kamrangan da·o Meghalaya a·dokoba BJP-ko bilakbatataha aro mikkangchi ong·atna sienggipa election-rangna ka·donganiko ra·baaha ine BJP-ni dilgiparang parakataha.
Biming segatani kamrang matchotahani gimin da·o biaptangtango dilgiparangko seokani ong·skaengaha ineba BJP parakataha.
“Chingni kamrango pangchake da·o Meghalaya a·dokni constituency ge·antion sak 60 mandal president-rangko chinga bakan parakatgnok,” ine BJP-ni dilgiparang parakataha.