SHILLONG: Adita salrangna skang, Mawlynnong gilja noko, Hindurangni dakrongbewal gita ‘Jai Shri Ram’ ine a·bokgipa Akash Sagar-ko police-rang rim·na man·kujaenga indiba uko rim·na jotton ka·enga ine parakatskaaha.
Police-rangni u·iatani gitade, ia mandeko rim·na gita sandirokanirangko dakkuenga aro ia mandeko bakan rim·na ka·dongenga.
Ia mandeko rim·na kam ka·ani bidingo talbate u·iatna jechakatengon, ia a·selni bidingo police-rang name sandirokanirangko dakkuenga ine police-rang parakataha.
Kristianrangni olakkiram noko ia mandeni, kragija dake Hindurangni dakbewalo ‘Jai Shri Ram’ ine a·bokahani gimin Meghalaya a·dokni pilak biaprangon Kristianrangsan ong·aigija dingtang dingtang dolrang aro bebera·giparangba raken jegalgrimtokahachim. Ia mandeni kosako badi ka·doangani ja·man police-rang, ia mandeni kosako mokordomakoba segatahachim.
Indake ong·genchimoba ia mande, an·tangni kamna maming sikkimpilani gri, social media-rango an·tangni video-rangko da·onan watskakuengachim.
Ia a·selni bidingo ia mande, kemaba bi·a dongkuja aro an·tangni video-koba da·onan kimite galkujaengachim.
