SHILLONG: State Reservation Policy (SRP)-ko nipilna gita songako man·gipa Expert Committee, a·doko songdongenggipa manderang aro dingtang dingtang dolrangko gronge agan-chanchirimani ja·man report-ko tarina a·bachengengaha ine Mongolbar salo, a·dokni Chief Secretary Donald P Wahlang parakataha.
“Report-ko matchotna gita Expert Committee, badita somoirangko nanggen da·o dipet anga an·tangde ma·sikuja indiba uamang report-ko tarina a·bachengengaha,” ine Wahlang aganaha.
Meghalaya a·dokni dingtang dingtang biaprangona re·ange a·dokni manderang aro dingtang dingtang dolrangko gronge agangrikanio sandie man·gipani bidingo chanchirimna gita Expert Committee, antisa skangsan Delhi-o tom·aniko ong·atangaha ineba Chief Secretary parakataha.
Reservation Committee-ko nipilna gita sorkarini songe on·gipa Expert Committee, Garo Hills, Shillong aro Jowai-ko man·chape a·dokni dingtang dingtang biaprango tom·anirangko ong·atangaha ineba ua aganaha.
State Reservation Policy-ko nipiltaiani bidingo a·doko songdongenggipa manderang aro dingtang dingtang dolrangni nangnikani aro chanchianirangko ra·na gita ia Expert Committee-na daitoko on·manahachim.
Ia Expert Committee-ko Justice (Retd) MC Garg chairman ong·e dilaha aro ia committee-o Justice (Retd) Dr Satish Chandra, Prof DV Kumar, Prof Chander Shekhar aro Prof Subhadip Mukherjee-ba membor ong·e dongpaahachim.
Indake ong·engon, Meghalaya Public Service Commission (MPSC)-ni kamrangko namdapatna gita songako man·gipa committee-ni report-ko ia jani bon·angachibara on·gnok ine a·dokni Chief Secretary parakataha.
Ia committee-ko Arts & Culture-ni Principal Secretary FR Kharkongor dile, ia committee-o Tourism-ni Director Cyril Diengdoh membor aro Education department-ni Secretary Ambrose Ch Marak, member secretary ong·skaahachim.
