SHILLONG: Bilsi 50 batpile Assam aro Meghalaya a·dokni simarango ong·enggipa golmalrangko namatna gita a·dok sorkari krenge kamko ka·enga ine a·dokni Deputy Chief Minister Sniawbhalang Dhar parakataha.
Dingtang dingtang neng·nikanirangko chagrongna nangengoba a·dok damgnini simarango ong·enggipa golmalrangko namatna gita sorkari rakbee kamko ka·enga ine janapatengon, “Ia golmalrang batanggimin bilsi 50-52-mangonin ong·engaha indiba batanggimin bilsi bongani gisepo ia golmalrangko namatna gita sorkari ja·kurangko de·chakataha,” ine Dhar aganaha.
A·dok damgnini simarango ong·enggipa golmalrangko namataniara a·dok sorkarini mongsonggipa daitorangoni mingsa ong·enga aro ia golmalrangko sorkari, man·a dipet ta·raken namatna jotton ka·enga ineba Deputy Chief Minister aganaha.
Block-I jolni ning·o meligrikna man·jaenggipa songrangni bidingo Deputy Commissioner-ni report-ko man·soahaon, West Jaintia Hills regional committee-ni report-ko sorkarina on·gnok ineba Dhar parakataha.
Deputy Chief Minister-ni parakatani gitade, West Jaintia Hills regional committee-ni report-ko tarina gita jagni somoiko Deputy Commissioner-na on·aha.
“Uni gimin DC-ni report-ko man·soahaon chinga chingni report-k sorkarina on·gnok aro uni ja·man a·dok damgnini sorkarirang, iani bidingo chanchirimanggen,” ine ua aganaha.
Assam aro Meghalaya a·dokni simarango ong·enggipa golmalrangko namatna gita a·dok damgnini sorkarirang gnigipa agangrikaniko a·bachengatahaoba, da·o Assam a·dokchipakni maming aganchakanirang dongkujaengani a·sel a·dok damgnini gisepo agangrikanirang bon·chongdika gita ong·engachim.
Ia a·dok damgnini simarango meligrikna man·jaenggipa biaprangko namatna ja·ku de·enggipa gnigipa bako man·chapenggipa biaprangara Langpih baksana Ri Bhoi a·jani Borduar, Nongwah-Mawtamur, Deshdoomreah, Block-II aro West Jaintia Hills-ni Block- I, Psiar – Khanduli jolrang ong·engachim.
Meghalaya aro Assam a·dokni simarango batanggimin bilsi 50-na meligrikna man·jaenggipa dam 12 biaprangoni damdok biaprangode tom·tomaniko ra·bapilna gita a·dok damgnini dilgiparang songgigrike soi ka·manahachim aro ia soi ka·grikanio Union Home Minister Amit Shah-ba dongpaahachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·achim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.
