TURA: Meghalaya a·dokni skanggipa State University, Captain Williamson Sangma State University-ko Kristianrangni dakbewalo, jinma bi·e pakwatna gita Education Minister Rakkam A Sangma-ni agananiko Khasi Jaintia Christian Leaders’ Forum (KJCLF) jegalatani ja·man, ia dolni janapatgipa kattarangko South Garo Hills a·jani social activist Greneth M Sangma jegalatskaenba, Meghalaya a·dokara Kristianrang songdongenggipa biapan ong·ani gimin a·dokni State University-ko Kristianrangni dakbewalo jinma bi·e pakwatna miksonganiara kragipa kaman ong·enga ine parakatskaaha.
Ia State University-ko Kristianrangni dakbewalo jinma bi·e pakwatna Education Minister-ni parakatani ja·man, iako KJCLF-ni dilgiparang jegalatenba, lekka pora on·chakgipa biapko Kristianrangni dakbewalo bi·e pakwatna manchianiara, ge·sa toromko mikkang niteani gitasa ong·enga ine Budbar salo parakatahachim.
Indake ong·genchimoba, KJCLF-ni matnange seatgipa kattarangko South Garo Hills a·jani social activist Greneth Sangma jegalatskaenba, Meghalaya a·dokara Kristianrangni songdongchakenggipa biapan ong·ani gimin a·dokni state university-ko bi·e pakwataniara a·dokni dakbewal rikbewalko aro toromni bebera·aniko mesokanisa ong·enga ine parakatskaaha.
“Meghalaya a·doko songdongenggipa mande saksa ong·e KJCLF-ni janapatgipa kattarangko anga raken jegalenga. Meghalaya a·dokara Kristianrangni jelbra jelsubatgipa a·dokan ong·a aro maming kamrangko a·bachengna skang bi·achi pakwataniara a·dokni aro Kristianrangni dakbewalko mesokanian ong·a. Ian Meghalaya a·dokna dingtangtegipa kam ong·ja maina pilak a·songrangon torom jelbatani kri apsan dakgipa ja·kurangkon de·ronga,” ine Sangma parakataha.
