SHILLONG: Meghalaya a·dokni skanggipa State University, Captain Williamson Sangma State University-ko kulina gita Kristianrangni dakbewalo pangchake jinma bi·e pakwatanggen ine aganani ja·man dingtang dingtang dolrangni matnanganirangko man·ahani gimin ia State University-na a·dok sorkari, Kristianrangonikosan ong·aigija pilak toromni dilgiparangonikon pattianiko ra·gen ine Bristibar salo, a·dokni Education Minister Rakkam A Sangma parakatskaaha.
Ia State University-ko kulina gita a·dok sorkari, dingtangmancha re·baenggipa January 13 tariko, jinma tom·bimonganiko ong·atna tik ka·manahachim.
Iani bidingo kobor ra·timgipa manderang baksa agangrikengon, ia University-na aro a·dokna sorkari, pilak toromni dilgiparangonikon pattianiko ra·gen ine Sangma talataniko on·angaha.
“An·chingni university, chatro chatrirang aro an·chingni a·dokna chinga toromko dilgiparang aro dingtang dingtang dolrangni pattianikosa ra·na miksongenga. Pattianiko ra·na bi·aniode maming ong·gijani dongja,” ine ua aganaha.
State University-ko kulina gita tom·aniko ong·atani bidingo uni agananiko kobor ra·timgiparangsa ma·sisretaha ineba Education Minister aganaha.
Capt Williamson Sangma State University-ko kulina tom·bimonganiko ong·atanio, a·dokni Chief Minister Conrad Sangma, dingtang dingtang cabinet minister-rang, MLA-rang aro sorkari official-rangba bak ra·na ka·dongsoengachim.
Ia State University-ko kulina gita Meghalaya sorkari, Kristianrangni bewalo jinma bi·rimaniko ong·atna miksongenga ine adita salrangna skang dingtang dingtang media-rango parakahachim.
Indiba iandake songbadrango seanirangko nikani ja·man dingtang dingtang Mondolirang aro gipin dolrangba a·dok sorkariko raken jegalattokahachim.
Indake ong·engon, ia gital kulienggipa State University-na pilak korosrangkon a·dok sorkari jako ra·gen ine Education Minister parakataha.
Ia University-ni pilak department-rangkode ia bilsio a·bachengna man·kujanaba gnang ine talataniko on·angengon, ia university-ni academic session-ko ia 2025 bilsini gisepon a·bachengatna sorkari jotton ka·enga ine Education Minister parakataha.
Ia university-ko chalaina gita sorkari, ge 150 sanction post-rangko ong·katatna miksongenga aro ianonin ge 50 post-rangkode ra·chakmanaha ineba Sangma parakataha.
January-ni 13 tarikara Meghalaya a·dokna gisik ra·beani sal ong·gen ine janapatengon, Meghalaya a·dokni bilsi 52 gapanio ia skanggipa State University-ko man·aha ine Education Minister aganaha.