SHILLONG: Meghalaya a·dokni skanggipa Captain Williamson Sangma State University-ko nokdonggaani bidingo adita jijagrikanirang ong·engon, Meghalaya a·dokni college-rang, ia State University-o bak ong·telna nanga ong·ja ine Sukrobar salo, a·dokni Chief Minister Conrad K Sangma, talataniko on·angaha.
A·doko donggipa college-rang, an·tangtangni nangnikani gita North Eastern Hill University (NEHU) ba gipin University-rangni ning·o bak ong·angkuna man·aigen ineba ua talataniko on·angaha.
“Pilak college-rangan an·tangtangni nangnikani gita je University-oba bak ong·na man·aigen. Uamang NEHU, USTM ba Captain Williamson Sangma State University-oba bak ong·na man·aigen aro college-rangko sorkari ia university baksa bak ong·na nanga ine draani dongja,” ine Sangma aganaha.
Indake ong·genchimoba, NEHU-o bak ong·kuenggipa college-rangde Common University Entrance Test (CUET)-ko sena nangskagen ine Chief Minister, gisik ra·atpiltaianiko on·angskaaha.
“NEHU-o bak ong·enggipa college-ni chatro chatrirangde, chubata gadangrango poraiangkuna gita CUET-ko sena nanggen maina mija bilsirangode an·chingo State University dongkujani giminsa CUET-oniko wataha indiba da·ode State University dongahani gimin CUET-oniko watani dongjawaha,” ine ua talataniko on·angaha.
Captain Williamson Sangma State University-ko Kristianrangni dakbewalo jinma bi·anichi a·bachengatna miksonganiko jegaltokengani gimin janapatengon, ia program-ko sorkarini dakrongbewal niamosa ong·atgen ine Chief Minister talataniko on·angaha.
“Ian sorkarini program-sa ong·a aro ia program-ona chinga Mondolini dilgiparang, dingtang dingtang toromni dilgiparang, songsalna kam ka·enggipa dolrang, cabinet minister-rang aro official-rangkoba okamataha. Gipin program-rango gitan chinga bi·anichi a·bachenggen aro iano maming ong·gijanide dongja,” ine Sangma aganaha.
Ia State University-ko kulianiara Meghalaya a·dokna gisik ra·beani sal ong·gen ineba Chief Minister parakataha.
