Land Transfer Act-ko taridapa dongkuja: CM
SHILLONG: Meghalaya Land Transfer Act-ko sorkari taridapaha ine jangbingbanganirangko Sukrobar salo, a·dokni Chief Minister Conrad K Sangma jegalatenba, ian tol·e matnangani aro pangchakani grigipasan ong·aia ine talataniko on·angaha.
Meghalaya Investment Agency (IMA)-ni daitorangko talate on·angengon, district council-rangko re·badeani katta dongja aro a·doko private investor-rangko a·a brena on·ani katta nakatja ine Chief Minister parakataha.
“Skangonin jekai a·doko district council aro songni nokni dilgiparangoniko permission nanga, mikkangchiba apsan niamkon ja·rikangkuaigen. Ia niamko a·doko chengonin ja·rikbaenga aro mikkangchiba ia apsan niamkon ja·rikangkuaigen,” ine Sangma aganaha.
IMA-ni bidingo talataniko on·angkuengon, sorkarini Meghalaya Tourism Development Corporation (MTDC) ba Meghalaya Industrial Development Corporation (MIDC)-rang kamko ka·a, apsan daken IMA-ba health, education, power aro tourism-ni kamrango invest ka·aniko nirokgipa bimang gitasan ong·aia ine Chief Minister parakataha.
“Ia IMA-ara, ma·mong aro a·dok sorkarirangni on·enggipa permission aro subsidy-rangna investor-rangni dorgasto galchakgipa one-stop portal-sa ong·a aro ian dorgastorangko tarianio nangchakegipa department ba agency-rang baksa agangrikgipasa ong·a. Indiba songni nokni dilgiparang aro district council-rangoniko pilak nanga permission-rangkode ra·telna nangaigen,” ine Sangma talataniko on·angaha.
A·arangko breanio IMA-ni man·gipa bilrangni gimin janapatskaengon, MIDC aro MTDC gitan IMA-naba investor-rangna land bank-rangko tarina bilko on·manaha ine Chief Minister parakataha.
Indake ong·genchimoba, Land Transfer Act-ko taridapa ba district council-rangni bilko re·badea ine matnanganirangkode Chief Minister raken jegalatskaaha.
