RESUBELPARA: Ja·manchake police-rangna FIR ka·ani gitade, re·anggipa December-ni 14 tarik walo, Resubelpara-o ong·atanggipa A·we Festival-ni somoio mande saksani scooty-ko ma·sina man·gijagipa manderang cha·uangaha.
North Garo Hills a·jani Mendipathar police station-ni ning·o donggipa Old Chipakram songni saksa Liush Marak minggipa mandeni Resubelpara police station-ni officer-in-charge-na FIR ka·doangani gitade, December-ni 14 tarik walni 8:30 bajimango ua, an·tangni jikgipa baksa A·we Festival-ko nina gita Resubelpara-ona re·bae, walni 9:00 bajimango Resubelpara Mini Stadium-ona sokbaaha aro ua an·tangni ML-13A 6987 TVS NTORQ scooty-ko DIET office sambao park ka·e donangahachim.
Apsan walni 11:10 bajimango uamang, A·we Festival-oni re·pilna gita an·tangni scooty dongipa biapona re·angon, ua biapo uni scooty dongjahachim. Uamang ua biaprangoniko sandibeoba, uni scooty-ko man·piljaha.
FIR-ko ka·anio ja·manchakahani gimin talataniko on·angengon, ua somoirango ua mi ratani kamrango aro Krismas Bilsi gitalni somoi ong·e kamrang jakchakjahani gimin FIR ka·na gita man·ningjaha ine Marak parakataha. Unbaksana uni saenggipa ambitang, January 9 tariko a·gilsakko watanganichi ua FIR ka·anio ja·manchakaha ine Marak talataniko on·angaha.
Batanggimin sal somoirangoba North Garo Hills a·jani dingtang dingtang biaprango gari gora cha·uaniko, mongsongbate scooty gimaanirangko bang·en knasona man·ahachim.
