Rel gariko ra·baanichi niam gri napsrukanirang dongkuja ine Mendi MLA a·kang

TURA: North Garo Hills a·jani Mendipathar-ona rel garirangko ra·baanichi da·o dipet uni ma·sianio, niam gri napsrukbagiparang saksaba dongkuja ine Mendipathar-ni MLA Marthon J Sangma a·kangataha.
News Channel ge·sa baksa agangrikanio Sangma, ia kattarangko aganaha.
Mendipathar-ona rel gariko ra·baanichi niam gri napsrukbagiparang dongkuja ine a·kangatengon, Meghalaya a·doko Tribal ong·gijagipa manderangni a·a breaniko aro niam gri songdong a·chaaniko champengna gita bilgipa Land Tenure System donga ine Sangma parakataha.
“Angni ma·siani gitade, rel garirangko ra·baanichi niam gri napsrukbae songdong a·chaenggiparang saksaba dongkuja. Meghalaya a·dokode Land Transfer Act dongani gimin gipin biapni manderang ba Non-Tribal-rang, Garo Hills-o skatang a·arangko bree songdongkamna man·ja,” ine ua aganaha.
Mendipathar Railway Station-ko kulianichi songni nokni manderangna, mongsongbate me·chikrangna janggi tangani cholrangko bang·batataha ineba Mendipathar MLA aganaha.
Mendipathar railway station-ko a·bachengatani ja·man, game ge·e cha·giparang, Guwahati songjinmaona komia damo ra·ange an·tangtangni game ge·e man·gipa bosturangko kraa damrango pale sim·e cha·na man·engaha ineba ua aganaha.
“Rel garirangko ra·baanichi karkanarangko aro manderangni janggi tangani gadangko dingtangatna man·aha aro mikkangchiba iani namgnirangko man·angkugen. Rel gario Guwahati-ona gong 60-kosan gamna nangaiani gimin songni manderang, mongsongbate me·chikrang, an·tangtangni bosturangko Guwahati songjinmaona ra·ange kraa damrango pale sim·e cha·na man·enga,” ine Sangma aganaha.
Mendipathar Industrial Area-o bilsi 30-mangni ja·man da·o gital karkanarangko kuliani giminba Mendipathar MLA gisik ra·atpiltaianiko on·angaha.
Ia jolrango Pepsi aro dingtang dingtang karkanarangko a·bachengataha gimin ua dingtangmancha a·dokni Chief Minister Conrad K Sangma-koba mittelpilangaha.
Mendipathar Railway Station-ko 2014 bilsio a·bachengahachim aro untalan Garo Hills-ko rel ramarangchi, a·songni dingtang dingtang biaprang baksa nangdimeatahachim.
Garo Hills-ona rel garirangko ra·baahaoba da·o dipet Khasi aro Jaintia Hills a·jarangode dingtang dingtang dolrang, niam gri napsrukanirangna kenchakenba raken jegaltokskakuengachim.