State University-ni ning·o bak ong·china a·dokni College-rangko CM didia
TURA: A·doko kulichenggipa state university, Captain Williamson Sangma State University-ko Sombar salo, a·dokni Chief Minister Conrad K Sangma do·ga oe on·angaha aro ia state university-ko do·ga oe on·anganio, Meghalaya Legislative Assembly-ni Speaker Thomas A Sangma, a·dokni Deputy Chief Minister Sniawbhalang Dhar, Assembly-ni Deputy Speaker TD Shira, Education Minister Rakkam A Sangma, Power Minister Abu Taher Mondal, dingtang dingtang MLA-rang aro sorkari official-rangba dongpae bak ra·angtokaha.
Ia Captain Williamson Sangma State University-ko do·ga oe on·anganio a·dokni Chief Minister, jinmana aganprakangengon, a·dokni skanggipa state university-ko do·ga oe on·na man·ahani gimin ian a·dokni manderangna gisik ra·beani sal ong·gnok aro ia university, chubata gadangni bida budirangkosan on·aigija a·doko lekka porani gadangko dingtangatna research-rangkoba dakgen ine parakataha.
“Meghalaya a·dokni bilsi 50 gapanio a·doktangni university dongkujachim indiba da·alo ia state university-ko kulina man·aniara, mikkangchi a·doko lekka porako tang·doatna ja·ku de·chakatani ong·aha,” ine Chief Minister aganaha.
Ia state university-ara ramram university-san ong·aijawa indiba Meghalaya a·dokni manderangna ka·donganiko, dal·rorona man·aniko aro arigri cholrangko on·ani ong·gen ineba Chief Minister aganaha.
Captain Williamson Sangma State University-ni Shillong Campus-ko bakan kuligen ine parakatengon, ia campus-an Khasi aro Jaintia Hills a·jani chatro chatrirangna dangdike on·angskagen ine Chief Minister aganaha.
Lekka porako on·anio chagrongna nangenggipa dingtang dingtang neng·nikrangko janapatengon, mikkangchi a·dokni re·mikkanganio, lekka porani nambatroroanikoba nikna man·gen ine Sangma, an·tangni ka·dongchakenganiko parakataha.
Ia University-ni kamrangko joljol a·bachenggnok aro a·doko donggipa college-rang, ia University-ni ning·o bak ong·na gita dorgastorangko galna man·gnok ine janapatengon, ia state university-o bak ong·gipa college-rangde post graduation aro under-graduation course-rangna Common University Entrance Test (CUET)-ko sena nangjawaha ine Chief Minister parakataha.
North Eastern Hill University (NEHU) gita dakgipa central university-o bak ong·enggipa college-ni chatro chatrirangde CUET-ko sena nangkugen ine janapatskaengon, a·dokni ning·o donggipa pilak college-rangkon ia State University-ni ning·o bak ong·china Chief Minister didiangaha.
Ia salni bako Williamnagar College, Baghmara-ni Captain Williamson Sangma College, Rongjeng Model College, Ampati Degree College, Tura-ni PA Sangma Abong Noga College, Tura-ni Mason Philips Academy, Mirriam Rural Women’s College aro Tura Christian College-rang, Captain Williamson Sangma State University-ni ning·o bak ong·na gita dorgastorangko on·angtokaha.
Ia tom·anio, Captain Williamson Sangma State University-ni Vice Chancellor Prof Vasanthi Vijayakumar-ba jinmana aganprakengon, Meghalaya a·dokni namroro silroroanina ia university-ni on·gilanio gamchatgipa ong·ani bidingo talatanirangko on·angskaaha.
Ia State University-ko rikna gita gong crore 16.96 koros chamaniko 2018 bilsini June jao ra·chakaha aro ia State University-ko 2023 bilsini January jao nokdonggaahachim.
Meghalaya a·doko donggipa technical college-rangko ia State University-ni ning·o bak ong·atna gita ia University-ko Captain Williamson Sangma State Technical University ine 2011 bilsio mingchengahachim indiba ia State University-o technical college-rangkosan ong·aigija pilak college-rangkon bak ong·atna gita ia University-ko Captain Williamson Sangma State University ine a·dok sorkari, 2022 bilsio mingskaaha.