SHILLONG: Ia jani gisepo, Meghalaya High Court-ko kulipilahaon, National People’s Party (NPP)-o napanggipa MLA sakgittamni kosako a·dokni Congress dol, badi ka·na miksongenga.
Congress dolko dilenggipa mande saksani kobor ra·timgiparangna parakatani gitade, NPP-o napanggipa MLA sakgittamni kosako Meghalaya High Court-na badi ka·na gita uamang da·o tariengaha aro iana Congress dolni ukil da·o pilak nanggipa lekkarangko High Court-o on·na gita tariengaha.
Sakgittam Congress MLA-ni NPP-o napangani da·o jabri ong·pilengahachim aro iani bidingo a·dokni Congress dol, ia MLA sakgittamni kosako ainni gita dakgrikna ru·uta somoirangonin senge dongengachim.
“Chuttini ja·man High Court-ko kulipilahaon chinga ia MLA sakgittamni kosako badi ka·doanggen. Iana chinga da·o kamrangko ka·soengaha aro chingni ukil, lekkarangko tariengaha,” ine Congress dolni dilgipa aganaha.
Congress MLA sakgittamni NPP-o napanganiara ainni gita ong·aia ine Assembly-ni Speaker Thomas A Sangma-ni parakatani ja·man, ia sakgittam MLA-rangni Assembly-o membor ong·aniko den·galchina gita a·dokni Congress dol dabiskaengachim.
Congress dolni MLA sakgittam, chong·motan Celestine Lyngdoh, Gabriel Wahlang, aro Charles Marngar, re·anggipa 2024 bilsini August jaon Congress dolko wate NPP-o napangskaahachim.
Ia sakgittam MLA-ni Congress dolko wate kataniara, Constitution-ni Tenth Schedule-o donggipa Paragraph 2(1)(a)-o pangchake, disqualify ka·ako man·na kraa ine batanggimin somoirangoba Congress dol, changni chang Assembly Speaker-na sedoatahachim.
