SHILLONG: Adita salrangna skang, a·doko gari gorarangko jakkalanio taridapgimin pipe-rangko chatenba janggipa gam·aniko champengatengon, a·dok sorkarini garirangkode mamung champengani gri mikpakma nienga ine matnanganiko Shillong Traffic Police (STP) jegalataha.
Iandake social media-rango matnanganiko jegalatengon, a·doko songdonggipa pilaknan tom·tomgipa aro dongtogipa biap ong·atna gitasa skatang horn on·aniko ba nangani gri gam·ataniko champengan baksa exhaust pipe teke salenggipa garirangko champengna gita u·iatman·aha jedakode a·doko noise pollution-oni naljoke dongan baksa air pollution-oniba komiatako man·gen ine STP u·iataha.
Indake traffic-o kam ka·enggipa sakantian skul sambao, hospital sambao, aro uandake bang·a biaprangon skatang gam·atani ba horn on·aniko champengna ja·ku de·aha aro niamko pe·ahaon ua mandeni kosako dairangko ra·gen ine STP u·iataha.
Una agreba, walni somoio gari gorarangko salengon, songdongenggipa sakantikon high beam headlight-rangko jakkaljachina gitaba STP didiataha.
Ia niamrangko pe·anio ra·gimin fine ba dairang STP-ni jako ong·ja indiba sorkarini treasury-ona sokangenga ineba STP u·idapataha.
Unbaksana sorkarini gari-kelkio andalatna jakkalenggipa gimikkon STP ra·galenba apsan dakgipa niamko ja·rikna didiangaha ine STP u·iataha.
