SHILLONG: Re·baenggipa February-ni 21 tariko ong·atenggipa Jaintia Hills Autonomous District Council (JHADC) election-o susana gita Mongolbar salo a·dokni Congress dol, sakgittam candidate-rangko parakdapataha.
Ia sakgittam candidate-rangara, Mowkaiaw constituency-na Pynbiangmi Laloo, Musniang-Rangad-na Brosent Siangshai aro Sumer constituency-na Bashan Tangliang ong·a.
JHADC election-o susana gita sakgittam candidate-rangni bimingko parakdapatahani gimin da·o KHADC aro JHADC election-o susana gita Congress dolni seokgimin candidate-rang gimik sak 45 gapengaha.
Re·anggipa January 10 tarikosan Congress dol, sak 16 candidate-rangni bimingko parakatahachim aro ia sak 16 candidate-rangoni sak 11-de KHADC election-na aro sak 5-de JHADC election-na ong·achim.
Una skang, re·anggipa bilsini December jaoba Congress dolni skanggipa candidate list-o gimik sak 26 candidate-rangko parakatahachim aro ianoni sak 15-de KHADC election-na aro sak 11-de JHADC election-o susanagipa candidate-rang ong·achim.