SHILLONG: Western Bypass ramako tarienggipa dolrang, da·o a·ran karini somoion kamrangko ta·rake ka·na miksongengoba, ia ramako tarianio dingtang dingtang neng·nikanirangko chagrongna nangskaenga.
Ia project-ni package 2 aro 3-ode a·a nokgiparangna district administration, a·ani tangka paisarangko gamanio ja·manchakengani a·selan a·a nokgiparangni champenganirangko man·rongenga.
Kobor on·timgiparangni u·iatani gitade, ia ramako tarianio a·a nokgiparangna ta·raken a·ani tangkarangko gamchina ia ramako tarienggipa company-rang, baditaba changde District Administration-na sedoatahachim.
Indake ong·engon, ia a·ani tangkarangko East Khasi Hills district administration-na chipatmanahachim indiba a·a nokgiparangna tangka paisarangko sualskakujaenga ine koborko on·aha.
Ia ramako tarianio a·a nokgiparangba an·tangtangni nangnikpaaniko janapatengon, uamangni a·arangna tangka paisarangko ta·rake gamchinasa uamang dabitokengachim ine a·a nokgiparang parakatskaaha.
Indake ong·genchimoba, iandake a·a nokgiparangna tangka paisarangko gamningjaengani a·sel, ia Western Bypass ramako tarianio ru·utroroskaengaha.
Shillong songjinmao garirangni apchangketaniko namatna miksonganiosa ia Western Bypass ramako tarina gita a·bachengatahachim indiba kamrang ka·sinengani a·selan ia neng·nikanirangko namatchipna man·skajaenga.
