SHILLONG: Meghalaya a·dokni dingtang dingtang koela a·damrango niam gri koela bikotani aro salanirangko nikna man·enga ine matnanganirangko sandirokna gita Meghalaya High Court, kamoni neng·takgimin Justice BP Katakey-ni dilanichi dingtangmancha committee-ko songe on·angaha.
South Garo Hills a·jani Dobakkol Nongalbibra aro uandakgipa koela a·damrango niam gri koelarangko bikotenga ine Justice (Retd) Katakey committee, dingtang dingtang manderangni badi ka·anirangko baditaba chang man·soahachim ine nikna man·a.
Iani bidingo kobor ra·timgiparangna talate on·angengon, manderangni badi ka·anirangko man·soahani gimin ua nangchakegipa department-rangna sandirokenba, an·tangtangni sandie man·anirangko report-o parakchina ua ge·etaniko on·ataha ine Mongolbar salo, Justice Katakey parakataha.
“Ia report-rangko anga man·soahaon nanga gita ja·kurangko de·anggen,” ine ua aganaha.
Badia badia biaprango niam gri koelarangko bikotenga ine badi ka·anirangko man·soengachim, uandakgipa biaprangona committee re·angenba, sandirokanggen ineba Justice Katakey parakataha.
Da·o dipet ia committee, iandakgipa badi ka·anirangko man·soe minggittamkode niatna man·aha aro da·o gital mingbri badi ka·anirangko man·sotaiaha ineba ua aganaha.
Ia badi ka·giparangoni mingsade, South Garo Hills a·jani Dobakkol Nongalbibra koela a·damo niam gri koela bikotenga ine Williamnagar-ni saksa Mingran T Sangma-ni badi ka·gipa ong·achim.
Ia biapo niam gri koela bikotanirangko district administration nikengoba, maming ja·kurangko de·jaenga ine ua Justice Katakey committee-na badi ka·doangahachim.
Iana agreba, West Khasi Hills aro South Garo Hills a·jani Goreng jolo donggipa koela a·damo niam gri koelarangko bikotenga ine saksa Krishan Kumar minggipa mande, Justice Katakey-na badi ka·doangaha. Ia koelarangko mande sakgni, tol·gipa invoice-rangko jakkale, Bangladesh a·songona ra·angenga ineba ua badi ka·doangahachim.
Ia mandeni parakatani gitade, ia koelarangko Nagaland a·dokonikosa ra·baenga ine a·kangenba, South Garo Hills a·jani Rongsa Awe depot-o done, Gasuapara Land Custom Station gita Bangladesh a·songona ra·angskaengachim.
