TURA: Mongolbar salo, West Garo Hills a·jani higher secondary skulrango poraienggipa chatro chatrirangna, a·dokni Chief Minister Conrad K Sangma, M-Tablet-rangko, Tura-ni District Auditorium-o suale on·ataha. Ia program-ko ong·atanio, Chief Minister baksana Meghalaya Legislative Assembly-ni Speaker Thomas A Sangma-ba dongpae, chatro chatrirangna M-Tab-rangko sualataha.
Ia M-Tab-rangara, Chief Minister’s Student Digital Learning Scheme-ni ning·o chatro chatrirangna suale on·enggipa ong·a aro ia Tablet-rango, Higher Secondary gadangni porikkana gitcham question paper-rang, mock question paper-rang aro dingtang dingtang porikkana aganchakgimin answer paper-rangko donaha. Ia M-Tablet-rango, audio-video, animation aro 3D graphic-rangkoba chatro chatrirangna donaha.
2021 bilsioni gimik lak 1-mangni gita tablet-rangko Class XI-ni chatro chatrirangna suale on·aha aro 2023-24 bilsioba ia scheme-oniko sak 30,480 chatri chatrirang namgnirangko man·aha.
West Garo Hills a·jao ge 3000-mangni gita M-Tab-rangko suale on·anggen aro Mongolbar salni program-o dam 21 higher secondary school-rangoni sak 400-na baten chatro chatrirang, tablet-rangko man·aha.
Skigiparangoniba, dingtang dingtang higher secondary skulrangoni sak 5,700-mangni gita skigiparang, ia tablet-rangko man·gen.
Ia M-Tab-rangko chatro chatrirangna suale on·anganio a·dokni Chief Minister, jinmana aganprakangengon, ia M-Tab-rangara, dingtang dingtang porikkarangko sena gita chatro chatrirangko tarisamsona tarigimin tablet-rang ong·a aro ian chatro chatrirangni skie ra·anio altubatataniko on·gen ine parakataha.
“Ia program-ara chatro chatrirangna ia ostrorangko suale on·na ong·atgipa program-san ong·ja indiba ian chingni na·simangko mikkangchi a·dokna ka·donganiko mesokanisa ong·enga,” ine ua aganaha.
Technology-ara mandeni janggi tanganio pilakni gitan dingtanganiko ra·baenga ine janapatengon, ia Tablet-rangko on·aniara sorkarini chatro chatrirangna simsakaniko mesokanisa ong·enga ine Chief Minister parakataha.
Shillong IT park-ni chu·sokgipa ong·engani gimin janapangengon, ia sal somoirango a·dokni chadamberangba US aro Europe a·songrango AI company-rangna kam ka·engaha ine Chief Minister parakataha.
Smart classroom-rangko aro digital-ko jakkale skie ra·aninichi chatro chatrirangna bang·en dakchakanirangko on·na man·a ine janapatskaengon, technology-de skie ra·aniko altubatataniosan dakchakaniko on·na man·aia ine Chief Minister, ia ostrorangko name jakkalchina chatro chatrirangko didiangaha.