SHILLONG: Meghalaya a·doko niam gri koela bikotaniko National Green Tribunal (NGT)-ni champengataoni da·o bilsi 10 batpilengahaoba a·doko scientific mining ba niam gita koela bikotaniko a·bachengna man·kujaengani gimin a·doko koela badinggipa manderang aro koela bikotanio pangchake janggi tangenggipa pilak manderangan da·o Coal Ministry-ni ra·chakaninasa senge dongtokengaha.
Iani bidingo kobor ra·timgipa manderang baksa agangrikengon, a·doko scientific mining-ko a·bachengatani bak gita adita jarangna skangsan a·dokni damgittam biaprango public hearing-rangko ong·ataha ine a·dokni Chief Minister Conrad K Sangma parakataha.
“Ia public hearing-rangko dakani ja·man Forest department aro Pollution Control Board, file-rangko nipilangaha. Da·o ia file-rang, New Delhi-o donggipa Coal Ministry-ona sokangahani gimin Ministry-ni ra·chakanikosa sengengaha,” ine Sangma aganaha.
Koela bikotaniko basakoni a·bachengpiltaina man·gen, iani giminde ua mamingkoba aganskajaha.
Scientific mining-ni kamrango dingtang dingtang dakna nanggnirang dongani gimin kamrangde ru·utaigen ineba ua ku·chake aganaha.
Meghalaya a·doko a·a ra·ani niamrang namen dingtangani gimin neng·nikanirang donga ine janapatengon, iani bidingo a·dokna dingtangmancha ma·mong sorkarini niam tarianiko nangenga ine Chief Minister talataniko on·angaha.
“Indake ong·genchimoba da·o kamrang bon·kamgipaona sokengaha,” ine Sangma, ku·rachakaniko on·angaha.
Galchipgimin koela a·kolrangni bidingo janapatskaengon, iandakgipa koela a·kolrangko chipna ba ra·pilna gita Meghalaya Reclamation Fund-oniko gong kror 500-mangni gita jakkalgen ine Chief Minister parakataha.
Dam 3-4 biaprango mongsonggipa project-rangnade a·dok sorkari, company-rangko tik ka·manahachim ine nikna man·a.
A·dokni dingtang dingtang biaprango niam gri koelarangko bikotengkua ine matnanganirangna aganchakaniko on·angengon, je biaprangon iandakgipa kamrangni gimin kobor man·a, uandakgipa biaprangode sorkari rakgipa ja·kurangko de·enga ine Sangma aganskaaha.