SHILLONG: Re·anggipa January-ni 12 tariko, Bangladesh a·songona niam gri mongma wagam badingatenggipa mande saksako 1st Battalion BSF-ni sipairang rim·na man·aha.
BSF Meghalaya Frontier-ni Public Relations Officer (PRO)-ni u·iatani gitade, intelligence-oniko kobor man·soani ja·man 1st Bn BSF-ni sipairang, January-ni 12 tariko, Bangladesh a·songona mongma wagam badingsrukatna sienggipa mande saksako rim·na man·aha aro ia mandeoniko mongma wagamkoba man·aha. Ja·mano ia mongma wagamko BSF sipairang, iani bidingo talbate am·sandianirangko dakna gita District Forest Office-na pakwate on·ataha.
Una agreba, ia apsan salon, 4th Battalion BSF-ni sipairang, India a·songona napsrukbaengmiting somoio Bangladesh a·songni mande sakbriko rim·na man·aha aro ia manderangko India-ona re·napbana dakchake on·enggipa India a·songni sakgittam manderangkoba rim·na man·aha.
Ia manderangko BSF-ni sipairang, East Khasi Hills aro Bangladesh a·songni simaoniko rim·na man·aha ine BSF Meghalaya Frontier-ni PRO parakataha.
