SHILLONG: Meghalaya a·dokni bang·bata Anganwadi centre-rangan obosta namsrangjahani gimin ia Anganwadi centre-rangko namdapatna gita ja·kurangko de·china a·dokni Social Welfare department, a·dok sorkariko didiataha.
Social Welfare department-ni Director Camelia Doreen Lyngwa-ni parakatani gitade, Meghalaya a·doko dam 6000-mangni gita Anganwadi centre-rang gnang indiba ia Anganwadi centre-rangoni bang·batan bilsi 20-mangna skang kuligiparangsa ong·e da·o namdapataniko nangengaha.
“Ia Anganwadi centre-rangoni bang·batan da·o namroroangjaengaha aro mitamde chu·gimik taripilna nangengaha. Mitam centre-rangkode da·o galchipnasa nangengaha,” ine Lyngwa aganaha.
Ia Anganwadi centre-rangko taridapna nangengahani gimin Social Welfare department, adita salrangna skangsan, nosto ong·gimin centre-rangko sandiangaha ineba official parakataha.
Official-rangni u·iatani gitade, a·dokni bang·bata Anganwadi centre-rangon bijoli, chi, paikana aro uandake nangchongmotgipa cholrang dongjani a·selan bi·sarangna aro me·chikrangna dangdike on·anio neng·nikanirangko chagrongna nangenga.
Indake ong·engon, ia Anganwadi centre-rangko taridapna gita department, da·o hisap ka·ani kamrangko a·bachengataha aro ia centre-rangko nambate taridapna tangka paisarangko a·dok sorkarioniko bi·atna tik ka·aha ine official-rang aganaha.
Anganwadi centre-rangara bi·sarangna aro bi·sa donggipa ma·giparangna dangdike on·chakram biap ong·ani gimin a·dokni Anganwadi centre-rangko ta·raken taridapna nangenga ineba official-rang parakataha.