SHILLONG: Meghalaya a·doko cancer saaniko man·giparang batroroengani gimin a·dok sorkari, cancer saaniko sanna gita dingtang dingtang sanchakram biaprangko aro sanna banani cholrangko nambatatna ja·ku de·enga.
Meghalaya a·doko cancer saaniko nambate sanna man·na gita Bristibar salo, a·dokni State Cancer Society, Mumbai songjinmani Tata Memorial Hospital baksa tom·aniko ong·atangaha aro ia tom·anio mongsonggipa chanchianiara, Tata Memorial Hospital-oniko medical linear accelerator (LINAC)-ko ra·bana chanchirimanian ong·aha.
Tom·a matchotani ja·man, kobor ra·timgiparangna talataniko on·angengon, Meghalaya a·doko songdongenggipa manderangni gisepo cancer saaniko ma·sibatrorobaengahani gimin Health department-ni Principal Secretary Sampath Kumar janapangaha. “Ia sal somoirango a·doko cancer man·gipa bang·bata manderangan an·tangtangko porikka ra·e nina aro sanna banna gita re·batokengaha,” ine Kumar aganaha.
Shillong songjinmani 70 bedded Cancer Hospital-o sagipa manderang chakroroangjaengahani gimin an·tangni jajrengchakaniko parakatengon, ia hospital-o sagipa manderangko bang·bate donna man·na gita palangrangkoba bang·bate donna nangengaha ine Kumar aganaha.
“Iani bidingo chinga Minister baksa chanchirimkuenga,” ine ua aganaha.
A·doko cervical aro breast cancer man·giparang bilongbatengani gimin janapatskaengon, cancer man·giparangko ta·rake rim·na man·na gita sorkari, porikka ra·e niani gital ostrorangko ra·bana jotton ka·enga ine Health department-ni Principal Secretary parakataha.
Meghalaya a·doko sanna bananirangko namdapatna gita Tata Memorial Hospital-ba a·dokni radio-oncoligist-rangko train ka·na ba skie on·na tik ka·aha.
Koborko on·ani gitade, a·dokni specialist doctor-rang, Tata Memorial Hospital-o jadokoni bilsisana internship ba fellowship-rangko dakanggen.