SHILLONG: Meghalaya a·dokko man·chengaoni bilsi 50 batpilengahaoba da·alonan pilak kamrangon a·dok sorkari, tangka paisarangna ma·mong sorkariosa pangchakkuengani gimin matnanganirangko man·engon, a·dokna aro a·doko songdongenggipa manderangni namgninasa a·dok sorkari, ma·mong sorkarioniko tangka paisarangko bi·enga ine a·dokni Deputy Chief Minister Prestone Tynsong parakataha.
“Chinga sakgipinrangko matnange rona somoi dongja indiba a·dokni namgnina chinga ma·mongona re·ange tangka paisarangko gilamena somoirangko man·aia. Chinga an·tangtangko bamate bi·amengoba ian a·doko songdongenggipa manderangni namgninasa ong·enga,” ine Tynsong aganaha.
District council election-na skang NPP-chi dilenggipa MDA sorkariko tangka paisa jakkalsreta ine Voice of the People’s Party (VPP)-ni matnanganina ia kattarangko Deputy Chief Minister aganchakaha.
NPP-chi dilenggipa MDA sorkari, ma·mong sorkariko kusi ong·atna man·engani a·selsa bang·bea tangka paisarangko aro dingtang dingtang project-rangko man·bae on·na man·enga ineba Tynsong aganaha.
Tangka paisa jakkalsreta ine matnanganirangko jegalatengon, uamang gisiko nange kamko ka·engani giminsa ma·mong sorkarioniko bang·bea tangka paisarangko aro dingtang dingtang scheme-rangko man·bae on·enga ine Tynsong parakataha.
“Chingade sakgipinko matnange roaigija manderangna kamrangko chu·sokatnasa kamrangko gisik nange ka·a,” ine ua aganaha.
A·dokni namroro silroroanina sorkari, neng·takpilgija kamrangko ka·enga ine janapatskaengon, “Ia project-rangara Prestone-na ba uni nokdangna ong·ja indiba a·doko songdongenggipa manderangna aro mikkangchi re·banagipa gital chasongni manderangnasa ong·enga,” ine Tynsong aganaha.