TURA: Re·baenggipa January 27 tarikoni 29 tarikona Central Agricultural University (Imphal)-ni ning·o Tura-o donggipa College of Community Science (CCS), Kolkata-ni ICAR-NINFET, Nagpur-ni ICAR-CICR, Deendayal Research Institute aro Barrackpore-ni ICAR-CRIJAF nangrimenba, ‘Threads of Heritage: Exploring Traditional Textiles and Natural Fibres’-ni bidingo National Symposium-ko January 27 tarikoni January 29 tarikona Ri Bhoi a·jani Umiam-o donggipa Post-Graduate Studies in Agricultural Sciences College-o ong·atengani gimin iana dingtangmancha poster-ko Sukrobar salo, Tura-ni CCS-o oprake on·angaha.
Sukrobar salo, College of Community Science-ni Conference Hall-o Press Conference-ko ong·atanio ia poster-ko oprake on·angaha.
Ia National Symposium-ko ong·atani bidingo College of Community Science-ni Dean Dr Jyoti Vastrad, dingtang dingtang media-ni manderangna talate on·angengon, ia symposium-ara, India a·songni man·e cha·begipa ba·ra aro kildingrangni bidingo jinmana u·iatna ong·atenggipa tom·ani ong·enga ine parakataha.
India a·songni salgro salaram a·dokrango, te·rik, anaros, wa·a aro uandakgipa ma·manti bol-wa·arangonikoba kilding tariengani gimin ian kilding tarina changgipa manderangni changa sapanirangko mesokani cholba ong·enga ineba Dr Vastrad aganaha.
Ia National Symposium-ko ong·atanio, u·i-ma·sigipa manderangni agan-talate on·ani, dake mesokani aro uandakgipa dingtang dingtang program-rangkoba ong·atanggen.
Unbaksana ia National Symposium-o Technical Sessions & Panel Discussions, Cultural & Textile Exhibition-rangkoba ong·atanggen.