SHILLONG: Shillong Smart City Project-ni ning·o Integrated Command Control Centre (ICCC)-ko oprakani ja·man jagnini somoion oprake on·giparang neng·nikanirang baksa nakataha. Songjinma gimiko bang·a LED screen-rangko tarie dongipa kam ka·jaengaha, project-ni kam ka·ani bidingo sing·doatanirangko dakangaha.
ICCC-ko batanggimin bilsini November 20 tariko Chief Minister Conrad K Sangma-chi oprakaha.
ICCC-ni bako LED screen-ko tekaha, jeon nangchongmotgipa koborrangko mesokatna aro somoi manchao mikrakatsoanirangko on·a tariaha. Bang·a screen-rang kam ka·jaenganiko nikengaha.
ICCC project-o Intelligent Traffic Management System (ITMS)-ko man·chapata jeon 20 Automatic Number Plate Recognition (ANPR) camera-rang police-ni gita mongsonggipa traffic junstion-rango ma·sirikna nanggipao kam ka·jaenga. Ia camera-rang traffic niam pe·arangko nirikna nanggipa ong·achim jekai a·rakdugae gari salgiparang aro niamgri gari dongiparang, jeon a·sel ong·gniko aro rama gari re·a changketako komiatna dakchakgipa ong·engachim.
Uamangni nambate kam ka·ani bidingo sing·doangaha, project-ko chalaie jakkalna police-ni jako chu·gimik pakwatangsrangkuja ine aganaha. Da·o dipet ia system-rangko jakkalanganio jedakgipa traffic niam pe·giparangko rim·ani bidingo rongtale parakatkujaenga.
Project-ni ning·o City Surveillance System-o ge-328 camera-rang donaha, jeon konta 24X7 nirokangna man·a aro batanggimin somoio a·sel ong·anirangko nipilangna record ka·angkua, aro mande mikkang ma·siangna jakkalgipa technology baksa ge-20 bosturangko donaha.
ICCC project-ko tangka kror 220-chi tariaha, iako songjinmako name dake nirokangna, tanggitik a·selrangna aganchakangna, nirikiangana aro manderangna dakchakaniko on·angna tariaha. Dingtang dingtang miksonganirango tarigenchimoba namgnina ra·bagipa namdapatna nangani dongkuaienga, songdonggiparang iani bidingo ma·sina sike sing·doangaha.
Urban Affairs Department-ni Commissioner aro Secretary Vijay Kumar D, project-ni kam ka·a gimik ba screen-rangni kam ka·jaengani bidingo sing·sandianina mamingkon aganchakatjaha.
Dingtanganiko nikna songjinma senggipa ong·e, Shillong Smart City Project-na chu·sokani ronggrikgipa kamrang baksa bangbango dongenga aro rongtale kamrangko ka·angna somoi nangkuenga.
