Baghmara: Micro Small and Medium Enterprises (MSME) Ministry-ni Union ba ma·mong Minister Jitan Ram Manjhi, Sonibar January 18 tariko South Garo Hills -ona re·baaha indake district-ni sorkari official-rang baksa Baghmara New Circuit House-ni Conference Hall-o tom·e district-o central-ni scheme-rangko ra·gatani kamrangko nipilangaha.
Deputy Commissioner, R Yanthan, central ba ma·mongni scheme-rangko district-o ra·gatanio badita chu·sokaniko man·engjok aro maidakgipa neng·nikarangko man·enga iarangni bidingo tarigipa presentation-ko on·aha.
Iarangni gisepon Minsiter Manjhi, kamrangko nipilangaon kusi ong·ako parakaha indiba Meghalaya, mongsongbate Baghmara-o MSMEs-ko bang·bate songna nangnikaniko janapaha, jedakode jolni manderang namgniko man·gen.
Indake Meghalaya-MSME-ni memborrangko awareness programko ong·atchina ge·etaha, jedakode manderang scheme-ni gimin u·ie ra·e namgnirangko ra·na man·gen. Uandake presentation-ko on·mitingo scheme-ko ra·gatanio maidakgipa neng·nikarangko chagrongna nanga, iarangni giminba talate on·angaha, jekon Union Minister name dake knatime ra·aha aro ua neng·nikanirangko ma·mong maidake dakchakna man·gen iarangni gimin chanchirimangaha.
Tom·anio MSME Ministry-ni Meghalaya-na on·gilanirangko nipilangaha, uni report-ko Vinamra Mishra IAS Director (GA&TP) on·angskangaha, India-o Agriculture ba ge·a gamani a·bani ja·man gnigipao MSME sector-an ban·gbate kamrangko bikote on·gipa ong·a ine aganaha.
Dr Milind Ramteke IAS Director (PM Vishwakarma) Division MSME Ministry, uan PM Vishwakarman aro gipin dingtang dingtantg scheme-rango kam ka·aniko aro Ministry-ni scheme-rangni gimin talate on·angaha.
Tom·anio a·dok aro ma·mong sorkarini representative-rang aro jolni entrepreneur-rang bak ra·angaha.
Programo Union Minister, Horticulture Department-ni gita Organic manure ba a·sal aro Vermi compost-na hajal 25-ni cheque-rang sualangaha. Skill Development Office-ni beneficiary-rangnaba training programko matchotanina certificate-rangko suale on·aha.
