SHILLONG: Re·baenggipa February jani 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-na dingtang dingtang political dolrang aro candidate-rang, dingtang dingtang biaprangona wenroroe campaign-rangko ka·chichaktokengahaon, ia Autonomous District Council (ADC) election-ko an·tangtangni man·gninasa chanchie chol gita ra·jachina United Democratic Party (UDP), dingtang dingtang political dolrangko aro election-o susaenggipa candidate-rangko didiataha.
“Election-na campaign ka·anirango dakmikani aro matnanggrikanirangko niatbo, ian district council election-rangode kraani ong·ja. District council-rangara an·ching Tribal-rangni namgnina on·gimin bimangsa ong·ani gimin an·ching Tribal-rang gitasa chanchie ja·kuko de·na nanga,” ine UDP-ni general secretary Jemino Mawthoh aganaha.
Bang·a manderangan district council election-ko an·tangtangni man·gnina chol dake ra·na jotton ka·engani gimin UDP iani bidingo ning·tue chanchibewalaha ine janapatengon, dingtang dingtang MLA, MDC aro gipin dilgiparang, district council-o nangchakegipa kamrangni bidingo an·tangtangni u·i-ma·sianirangko sualgrikaha ine UDP-ni general secretary parakataha.
“Iandakgipa kamrangchi district council election-o susaaniara kraani ong·ja indiba an·ching, MDC election-o susaenggipa an·tangtangni dilgiparangna name ma·siate on·na nanga. ADC election-de gipin election-rangoni namen dingtanggrika,” ine Mawthoh aganaha.
Autonomous District Council-rangara miksongani donga ine janapatengon, Tribal-rangna district council-rangara mai dakgipa ong·a, pilak dilgiparangan iako name ma·sie ra·na nanga ine Mawthoh aganaha.
Ia KHADC aro JHADC election-o UDP, gimik dam 35 constituency-rango susaenga ine nikna man·a.
