SHILLONG: Meghalaya a·doko drugs ba pekatgipa samrangko jakkale ong·katna man·gija dongenggipa manderangko sanchakna gita a·dok sorkari, biaprangko rikna miksongengon, a·dok sorkarini ra·gatgipa Drug Reduction, Elimination & Action Mission (DREAM) program-ni ning·o, 50 bedded Centre of Excellence-ko Shillong songjinmani North Eastern Indira Gandhi Regional Institute of Health & Medical Science (NEIGRIHMS)-o kulina sienga.
Ia DREAM program-ara a·doko drugs jakkalaniko bon·atsrange, drugs ba pekatgipa samrangoni jakgitel ong·gipa a·dok ong·atna miksonge sorkarini a·bachengatgipa program ong·achim.
Indake ong·engon, ia DREAM program-ni ning·o a·dok sorkari, India sorkarini dakchakanichi ge 50 palang donggipa Centre of Excellence-ko kulina sienga aro ian drug addict ong·gipa manderangna, pekatgipa samrangko watna dakchakanirangko on·an baksana sanna bananirangkoba on·anggen.
Punjab a·doko, iandake drugs jakkalaniko warachakna man·ahani gimin ia DREAM program-ni bak gita a·dok sorkari, Punjab a·dokona re·ange, maikai drugs jakkalaniko warachakna nanga, uarangni bidingo skie ra·ena miksongenga.
Una agreba, a·doko drugs jakkalaniko warachakanio bilakbatatna gita a·dok sorkari, toromni dilgiparang baksaba bakrime kamrangko ka·enga aro drugs jakkalani namgijaniko ma·siate on·anio tangka paisarangkoba dakchake on·enga.
Research dakgipa manderangni aganani gitade, bang·bata drugs jakkalgipa manderangan ta·makkurangko jakkalanichisa pekatgipa bosturangko jakkalna a·bachengahachim.
2018-19 bilsini Global Youth Tobacco Survey (GYTS-4)-o parakani gitade, Meghalaya a·doko bilsi 13-oni 15 ong·gipa chadamberangoni 33.6 percent-de ta·makkuko ringgiparang ong·a aro iako namatna gita Education aro Health department-rangni nangrimgipa ToFEI program-ni ning·o, a·dok gimikni 8000-na baten skulrango poraiengipa lak 4.9 chatro chatrirangna mikrakatanirangko on·aha.
Meghalaya Police-ni u·iatani gitade, a·doko lak 3-mangni gita drug addict-rang donga aro ianoni 6.34 percent-de opioid-rangko jakkalgipa, 1.68 percent-de ganjarangko jakkalgipa aro 0.05 percent-de cocaine-ko jakkalgiparang ong·a.