So·sojengjeng ong·aniko namatna curfew-ko ra·gata
SHILLONG: Sombar salo, East Khasi Hills a·jani Mawkynrew songo, Ramakrishna Mission School-ko rikna a·a on·ani bidingo songni manderang jegalanio police-rang baksa nanggrike so·sojengjeng ong·na nangaha aro uandaken ja·mano so·sojengjeng ong·aniko chel·chakna gita District Administration, ia jolrango curfew-ko ra·gatangaha.
Koborko on·ani gitade, Mawkynrew-o donggipa a·ako Mawkynrew Pyllun-ni dilgiparang, Ramakrishna Mission School-ko rikna Ramakrishna Mission-ni dilgiparangna on·ahani gimin Sombar salo, Mawlein aro Mawkynrew songni manderang, ka·a ding·chaoenba, jegalanirangko dakna a·bachengaha. Ja·mano songni manderang, ia biapo rikenggipa skul nokko pe·e galna jotton ka·on, ua biapo nitimenggipa police-rang aro magistrate baksa nanggrikaha aro uandaken ja·mano manderangko katatna gita police-rang, gol·dikrangchi manderangko dokaha aro tear gas-rangkoba gona nangaha.
Jegalenggipa manderangni a·kangani gitade, ia biapo kal·chakramko rikna gita Mawkynrew Sports Club-na on·manahachim indiba Mawkynrew Pyllun-ni dilgiparang, songni manderangna u·iatchenggija ia biapo Ramakrishna Mission School-ko rikna on·skaahachim.
Iandake songni manderang, jegalanirangko dake, ia biapo rikenggipa skul nokko pe·e galna jotton ka·on, police-rang, manderangko katatna gita gol·dikrangchi dokruruaha aro tear gas-rangkoba goaha. Dolgni dinggrikanio police-rangko man·chape baditaba sak manderang saknaanirangko man·na nangaha ineba kobor on·timgiparang u·iataha.
Indake ong·engon, ia biapo so·sojengjeng ong·anirang batroroangjana gita aro manderang noktangtangoni ong·kate golmalrangko ong·atna man·jana gita East Khasi Hills a·jani District Magistrate, Mawkynrew song gimikon curfew-ko ra·gatangaha.
Iani bidingo u·iataniko on·atengon, Mawkynrew songo rikenggipa Ramakrishna Mission School-ko nisie galani aro manderangni gam-jinrangko nisie galani bidingo kobor man·soani ja·man, so·sojengjeng ong·aniko chel·chakna gita ia jolrango curfew-ko ra·gatangaha ine East Khasi Hills a·jani District Magistrate Rosetta Mary Kurbah parakataha.
Mawkynrew songo so·sojengjeng ong·anirang namangkujaskal ia jol gimikon Bharatiya Nagarik Suraksha Sanhita (BNSS)-ni Section 163-ni niamrangko ja·rikanggen ineba District Magistrate u·iataha.
Ia jolrango tom·tomaniko rakkina gita dongimin niamrangko ja·rikchina gitaba ua jolo songdongenggipa manderangko didiataha.